Álem • 03 Aqpan, 2020

Ystanbulda eki birdeı onlaın qazaq synyby ashyldy

92 ret kórsetildi

Ystanbulda qazaq tilin oqytatyn eki birdeı onlaın synyp jumysyn bastady, dep jazady Egemen.kz

KATEAD qaýymdastyǵy men «Otandastar» qory arasynda 2019 jylǵy 21 mamyrda qol qoıylǵan hattama negizinde ashylǵan bul kýrs onlaın rejimde ótedi ári tegin bolady.

"Kýrsqa qajetti jabdyqtar 2019 jyldyń 10 jeltoqsanynda Qazaqstannan jóneltildi. Qazaq tili kýrsy Ystanbuldyń eki aımaǵynda uıymdastyrylady: birinshisi Zeıtınbýrn aýdanynda, al ekinshisi Baǵdjylar aýdanynda. Bul eki jer Túrkııa qazaqtarynyń kóp qonystanýyna baılanysty tańdaldy. Baǵdjylar aýdanynda kýrs qazaqtar negizin qalaǵan Qoja Ahmet Iаsaýı bilim jáne aımaqtyq qorynyń ǵımaratynda ótedi. Bul úshin KATEAD qaýymdastyǵy men Qoja Ahmet Iаsaýı qory arasynda 3 jyl merzimge arnalǵan hattamaǵa qol qoıylyp, Qazaqstannan jetkizilgen dáristerge arnalǵan jabdyqtar sol jerge de aparyldy", deıdi KATEAD tóraǵasy Ertolqyn Gaıretýllah.

Sabaq Microsoft Teams baǵdarlamasy arqyly tikeleı efırde júrgiziledi. Oqý baǵdarlamasy oqý, tyńdaý jáne sóıleý daǵdylaryn jetildirýge arnalǵan shyǵarmashylyq tapsyrmalary bar 45 ınteraktıvti sabaqtan turady. Sabaq nátıjesi boıynsha mektep jasyndaǵy oqýshylar Qazaqstan Respýblıkasyndaǵy jazǵy lagerlerge de jiberiledi.


"Bul shara Túrkııada turatyn qazaqtardyń atajurtpen baılanysyn nyǵaıtary sózsiz. Ári osynda týyp-ósken, qazaq tilin jetik meńgergisi keletin qandastarymyz úshin de úlken múmkindik. Biz "Otandastar qorynyń" tóraǵasy Nurtaı Ábiqaev myrzaǵa, Dúnıejúzi qazaqtary qaýymdastyǵynyń birinshi orynbasary Zaýytbek Turysbekov myrzaǵa jáne osy múmkindikti týdyrǵan barlyq azamattarǵa alǵysymyzdy bildiremiz. Biz, qaýymdastyq retinde, qazaq mádenıeti men tili úshin qarqyndy jumys isteýdi jalǵastyra otyryp, osyndaı is-sharalardyń nátıjesinde qazaq mádenıeti men tilin saqtap qala alamyz dep senemiz", - deıdi KATEAD tóraǵasy Ertolqyn Gaıretýllah.

 

Sońǵy jańalyqtar

Elorda «jasyl» aımaqqa ótti

Koronavırýs • Keshe

Uqsas jańalyqtar