Astananyń tehnıkalyq qyzmet kórsetý stansalarynyń birinde osyndaı ospadar oqıǵa oryn aldy. О́ziniń kezek kútip tura almaıtynyn bildirgen jas jigit qaltasynan qarýyn shyǵaryp, onymen stansa qyzmetkerlerin nysanaǵa aldy. Shamasy, ózderindegi ómir shyndyǵyna tipti de sáıkes kele bermeıtin jelilerge toly sheteldik atys-shabys fılmderin kóbirek kórip qoıyp, sodan qaýashaǵy kádimgideı ýlanyp qalsa kerek.
Astananyń tehnıkalyq qyzmet kórsetý stansalarynyń birinde osyndaı ospadar oqıǵa oryn aldy. О́ziniń kezek kútip tura almaıtynyn bildirgen jas jigit qaltasynan qarýyn shyǵaryp, onymen stansa qyzmetkerlerin nysanaǵa aldy. Shamasy, ózderindegi ómir shyndyǵyna tipti de sáıkes kele bermeıtin jelilerge toly sheteldik atys-shabys fılmderin kóbirek kórip qoıyp, sodan qaýashaǵy kádimgideı ýlanyp qalsa kerek.
Osy oqıǵaǵa baılanysty jedel jetken jol-patrýldik polısııasy qyzmetkerleri 23 jasar sodyrdy tez quryqtady. Tártip saqshylary aldynda onyń manaǵy jaýyngerlik-sarbazdyq turqynan tutam da qalǵan joq.
Astana qalalyq ishki ister departamenti baspasóz qyzmetiniń málimetinshe, tehnıkalyq qyzmet kórsetý stansasyna kóliginiń dońǵalaqtaryn aýystyrýǵa kelgen jas jigit óz kezegin kútkisi kelmeı, biraz bulǵalaqtaıdy. Aqyrynda sol úshin stansa qyzmetshilerimen sózge kelip qalady. Osy janjaldyń ústinde «sheteldik kınolarǵa jastaıynan eligip, áýeıi bolyp qalǵan» áýleki jigit qaharmandyǵyn tanytpaq bolyp, ózi qaltasyna kúndiz-túni salyp júretin travmatıkalyq tapanshasyn shyǵaryp, stansa qyzmetkerlerine qaraı oq atqan.
Osy atystyń saldarynan 33 jastaǵy er adamnyń keýde tusyna oq tıedi. Kelesi oq ekinshi jumysshynyń jambasyna baryp qadalady. Aıaqastynan jaraqat alyp qalǵan olar shuǵyl jetken «jedel járdem» dárigerleriniń kómegimen aýrýhanaǵa jóneltiledi.
Qazir atalmysh oqıǵa boıynsha Qylmystyq kodekstiń 257-baby 3-tarmaǵy boıynsha qylmystyq is qozǵalǵan. Al travmatıkalyq tapansha birden tárkilenip alyndy. Jedel qolǵa alynǵan tergeý sharalarynyń barysynda kúdiktiniń osyǵan deıin dál osyndaı qylyǵy úshin qylmystyq jaýapkershilikke tartylǵany belgili boldy.
Ustalǵan adam Astana qalasynyń ýaqytsha ustaý oqshaýlaǵyshyna qamaldy. Kesheden bastap tergeý amaldary júrip jatyr.
Murat AITQOJA.
