Saltanatty rásim barysynda aýylda boı kótergen jańa turǵyn úılerdiń kiltin oblys ákiminiń orynbasary Erjan Jylqybaev pen Qazaqstan Musylmandary dinı basqarmasynyń tóraǵasy, Bas múftı Naýryzbaı qajy Taǵanuly tabys etti.
«Kelisti atanyń joly keıingige úlgi» demekshi, jaqsy isti jańǵyrtyp, jalpynyń janyn jadyratqan «Asar» – aǵaıynnyń arasyn nyǵaıtýǵa, álsizdi demeýge úlken sebepker, el arasyna tyń oı salǵan ıgilikti is. «Asarlatyp úı salý» jobasy aıasynda Talas aýdany Aqqum aýylynyń turǵyny Qanat Tákeevke baspana berildi. Sondaı-aq aýyldaǵy Tólebaı Tuńǵatar meshitine qyzmettik nysannyń kilti tabys etildi. Bul is-sharaǵa aýyldan shyqqan eriktiler de zor úles qosty.
«Jaqsylyqty bólisseń, kóbeıedi. Synaqqa toly ómirde bizdiń ǵumyrymyz osyndaı jaqsy isterden turýy tıis. Osyndaı qaıyrymdy isterdiń uıytqysy bolyp júrgen aýyl turǵyndaryna Alla razy bolsyn! Baspanaǵa muqtaj azamattardyń isine Alla jeńildik bersin. Búgin aq túıeniń qarny jarylyp, aqjoltaı jańalyqqa toldy. Endeshe bári sátimen bolǵaı. Bizdiń ımamdar, qaıyrymdy jandar osyndaı qysyltaıań ýaqytta da toqtamaı, úlgi isterin jalǵastyrýda. О́nege is jalǵasyn tapsyn», dedi jıyn barysynda aǵynan jarylǵan Bas múftı.
Jańa baspananyń syrty qorshalyp, zamanaýı úlgide soǵylǵan. Kólemi 110 sharshy metrlik tórt bólmeli úıdiń qurylysyn aýyl jastary týra tórt aıdyń ishinde aıaqtap shyqty. Qurylys jumystaryna 4 mıllıon teńge qarajat ketken. Ony da aýyldastar men kásipkerler jınap berdi. Tipti, alys-jaqyn oblystardan da kómek qolyn sozǵan aǵaıyn men elge tanymal óner qaıratkerleri de bar. Demeýshilerdiń kómegimen jańa qonys ıelerine jıhaz ben turmystyq tehnıka tartý etildi. Aıta keterligi, Qanat Tákeev – tórt balany tárbıelep otyrǵan jalǵyzbasty áke. Onyń jubaıy birneshe jyl buryn jol apatynan qaza tapqan edi.
«Búgin osyndaı úlken úı salyp berýge atsalysqan aýdan, aýylymyzdyń basshylaryna, ımamǵa, aqsaqaldar men jastarǵa, kásipkerlerge, barlyq aýyldastaryma alǵysym sheksiz. Yntymaq-birligimiz ajyramasyn. Qıyn-qystaý kezde osyndaı qoldaý kórsetken barshańyzǵa Allanyń nury jaýsyn», deıdi qýanyshyn jasyra almaǵan jańa qonys ıesi Qanat Tákeev.
Qyzmettik úıdiń qurylysyn júrgizýge Aqqum aýylynyń azamaty Asangeldi Otarov tikeleı jetekshilik etip, negizgi qarajatty óz qaltasynan tóledi. Quny 3 mıllıon teńgelik 4 bólmeli, 90 sharshy metr bul nysan aýyldaǵy Tólebaı Tuńǵatar meshitine berildi. Onda aýyl balalary asyl dinimiz Islamnyń qyr-syryn úırenedi. Qyzmet úıi ustazdarynyń jalaqysyn aýyldan shyqqan azamat Talǵat Baısynov óz qaltasynan tólep otyratynyn jetkizdi.
Bas mýftı Naýryzbaı qajy Taǵanuly jıyn barysynda aýyldaǵy jańa ǵımarattardy salýǵa atsalysqan Asangeldi Otarov pen Talǵat Baısynovqa Qazaqstan musylmandar dinı basqarmasynyń Alǵys hatyn tabystady. Talas aýdanynyń ákimi Baqyt Qazanbasov baspana salýǵa uıytqy bolyp, turǵyndardy uıymdastyrǵan aýyl azamattary Oljas Otar men kásipker Muhtar Shahanovty «Talas aýdanyna sińirgen eńbegi úshin» medalimen marapattasa, aýdan ákiminiń Alǵys haty kómek qolyn sozǵan birneshe aýyl turǵynyna berildi. Sonymen qatar qurylysty aıaqtaýǵa qolushyn sozǵan Murat Oshaqbaevqa «Talas aýdanynyń qurmetti ardageri» medali tartý etildi.
Sondaı-aq jıyn barysynda belgili aıtysker aqyn Shorabek Aıdarov jınalǵan qaýymǵa arnaý aıtty.
Qaıyrymdylyq sharasynan keıin jańa úıdiń aýlasyna aǵash otyrǵyzyldy. Aýyl turǵyndary mundaı ıgi sharanyń aldaǵy ýaqytta da jalǵasatynyn jetkizdi. Bas mýftı aýyldyq okrýg aýrýhanasyna ókpeni jasandy jeldetý apparatyn tabystady. Sondaı-aq 10 otbasyǵa azyq-túlik taratyldy. Aýyl eriktileri «Asarlatyp úı salý» bastamasyna osylaısha bir kisideı úles qosty.
Saltanatty rásimnen keıin oblys ákiminiń orynbasary Erjan Jylqybaev pen Qazaqstan Musylmandary dinı basqarmasynyń tóraǵasy, Bas múftı Naýryzbaı qajy Taǵanuly, Talas aýdanynyń ákimi Baqyt Qazanbasov jemis aǵashyn otyrǵyzdy.
Aıta ketý kerek, buǵan deıin Talas aýdanynda asarlatyp salynǵan úılerdiń alǵashqysy Maıtóbe aýylynda berilgen edi. Qazirgi tańda aımaqtaǵy eriktiler jumylǵan ıgilikti is kópshiliktiń kóńilinen shyǵyp, buqara jurtty qýanyshqa bólep keledi. Joba aıasynda Talas aýdanyndaǵy 9 aýyldyq okrýginde turǵyn úı salý jumysy qarqyndy júrip jatyr. Negizinen, asarlatyp salynǵan úıler áleýmettik jaǵynan az qamtylǵan, kópbalaly jáne asyraýshysynan aıyrylǵan otbasylarǵa beriledi. Qurylysty júrgizýge aýyl turǵyndary, aqsaqaldar, jastar kómektesip, kásipkerler demeýshilik kórsetedi.
Jambyl oblysy
