Brıýsselde Eýropalyq Odaq jáne Ortalyq Azııa elderiniń jetinshi Mınıstrlik kezdesýi bolyp ótti. Qazaqstannan kezdesýge Syrtqy ister mınıstri Erlan Ydyrysov qatysty.
Brıýsselde Eýropalyq Odaq jáne Ortalyq Azııa elderiniń jetinshi Mınıstrlik kezdesýi bolyp ótti. Qazaqstannan kezdesýge Syrtqy ister mınıstri Erlan Ydyrysov qatysty.
Otyrys barysynda syrtqy saıasat vedomstvolarynyń basshylary Ortalyq Azııadaǵy Eýroodaq strategııasy sheńberindegi óńiraralyq yntymaqtastyq máselelerin talqylady. Budan bólek, taraptar sot-quqyqtyq júıeni reformalaý, bilim berý standarttary men sapasyn arttyrý, qorshaǵan ortany qorǵaý ózara saýda kólemi men ınvestısııa túsimin arttyrýǵa baǵyttalǵan Ortalyq Azııa óńirindegi Eýroodaqtyń mańyzdy bastamalaryn qarastyrdy.
Qazaqstannyń EO-nyń óńirlik strategııasy sheńberinde iske asyrylyp jatqan is-sharalaryna belsendi qatysyp kele jatqandyǵy atap ótildi. Atap aıtqanda, zań ústemdigi jónindegi eýropalyq bastamanyń kezekti kezdesýi 2014 jyly Astanada ótkizilýi usynylyp, oǵan barlyq múddeli taraptar qoldaý bildirdi.
Zańnyń ústemdigi jónindegi pikirtalas barysynda terrorızm, sybaılas jemqorlyq pen uıymdasqan qylmysqa qarsy kúres salasyndaǵy quqyqtyq yntymaqtastyq máseleleri talqylandy. Osy oraıda E.Ydyrysov Qazaqstannyń qylmystyq óndiris jáne sybaılas jemqorlyqpen kúres salasynda 6 mańyzdy eýropalyq konvensııaǵa qosylý máselesinde qol jetkizilgen ýaǵdalastyqty atap ótip, birikken Eýropanyń barlyq qurylymdaryn ulttyq zańnamany sheteldiń ozyq tájirıbesimen sáıkestendirýge baǵyttalǵan Qazaqstannyń bul bastamasyn qoldaýǵa shaqyrdy.
E.Ydyrysov Eýroodaqpen áriptestiktiń basym baǵyttarynyń biri retinde Qazaqstanǵa ınnovasııa jáne tehnologııalardy tartý salasyndaǵy yntymaqtastyq pen bilim berý salasyndaǵy ózara árekettestikti anyqtady. Qazaqstandyq dıplomat ınnovasııalyq «jasyl» tehnologııalardy Ortalyq Azııa óńirine transfertteýdi qoldaı otyryp, EO basshylyǵyn «Jasyl kópir» seriktestigi baǵdarlamasyna qosylýǵa shaqyrdy. Budan bólek, kezdesýde Ortalyq Azııadaǵy problemalar, sonyń ishinde, Aýǵanstannan halyqaralyq kontıngenttiń shyǵarylýyna oraı týyndaýy múmkin máseleler, jańa jahandyq qaýip-qaterler men kedeıshilik problemalary, sondaı-aq, Ortalyq Azııa elderin damytýǵa járdemdesý máseleleri talqylandy.
Mınıstrler kezdesýi aıaqtalǵan soń E.Ydyrysov Lıtva Syrtqy ister mınıstri Lınýs Lınkıavıchıýspen (2013 jyldyń 31 jeltoqsanyna deıin Lıtva EO Keńesiniń tóraǵasy) jáne Eýroodaqty damytý jónindegi komıssar Andrıs Pıbalgspen ekijaqty kelissózder ótkizdi. Atalǵan kezdesýler barysynda Ortalyq Azııaǵa járdemdesý jónindegi EO baǵdarlamalary, saıası jáne ekonomıkalyq yntymaqtastyqtyń túrli aspektileri, qazaqstandyq áýe kompanııalarynyń eýropalyq áýe keńistiginde ushý múmkindigin keńeıtý, sondaı-aq, Qazaqstan azamattary úshin vızalyq tártipti jeńildetý máseleleri talqylandy.
«Egemen-aqparat».
