Jıynda oblys boıynsha sanıtarlyq-epıdemııalyq qadaǵalaý departamenti basshysynyń mindetin atqarýshy Neılıa Mýlıkova ótken aıda Jambyl oblysynda koronavırýstyq ınfeksııanyń 60 jaǵdaıy tirkelgenin, ol aldyńǵy aımen salystyrǵanda aýrýshańdyq deńgeıiniń 1,4 esege óskenin kórsetetinin habarlady. Onyń aıtýynsha, jaǵdaılardyń kóbi Taraz qalasy, Shý, Baızaq jáne Qordaı aýdandarynda anyqtalǵan. Alaıda, 31 ınfeksııa oshaqtarynda qorytyndy dezınfeksııalyq sharalar júrgizilip, baılanysta bolǵan 230 adam úı karantınine oqshaýlanǵan.
Aǵymdaǵy jylǵy 10 qazan men 6 qarasha aralyǵynda monıtorıngtik toptar 9125 nysandy qamtyp, 1328 reıdtik tekserister júrgizgen. Nátıjesinde, karantındik rejimniń 530 buzylý deregi anyqtalyp, 17 mıllıon 852 myń 840 teńgege 163 hattama toltyrylǵan. Bul rette Neılıa Mýlıkova Baızaq, Shý, Talas, Sarysý aýdandary men Taraz qalasynyń mobıldi toptarynyń jumysyn jandandyrý qajettigin aıtty. Jıyn barysynda Jambyl oblysynyń ákimi Berdibek Saparbaev monıtorıngtik toptarǵa turǵyndar men kásipkerlik sýbektileriniń shekteý jáne karantındik sharalardyń saqtalýyna baqylaý júrgizý jumystaryn kúsheıtýdi tapsyrdy.
"Oblys ortalyǵyndaǵy toptar 3000-nan astam nysandy tekserip, tek 174 buzýshylyqty anyqtaǵan. Osy ýaqytqa deıin tek 60 materıal kelip túsken. Keıbir aýdandardaǵy jaǵdaı da osyǵan uqsas. Kóptegen reıdtik tekseristen nátıje joq", dedi ákim.
Al oblystyq polısııa departamentiniń bastyǵy, general-maıor Janat Súleımenov taýarlar men qyzmetterdiń sapasy men qaýipsizdigin baqylaý departamentiniń qyzmetkerlerin atalǵan reıdtik sharalarǵa qatysýǵa shaqyrdy. Sondaı-aq Neılıa Mýlıkova oblys aýdandaryndaǵy barlyq vedomstvolardyń jedel ózara is-qımylyn uıymdastyrý úshin úılestirý ortalyqtaryn qurýdy usyndy. Oblystyq densaýlyq saqtaý basqarmasynyń basshysy Áset Qalıev turǵyndardy tumaýǵa qarsy vaksınasııalaý barysy týraly baıandady.
Búginde oblysta 345 myńnan astam adam vaksınasııadan ótken. Halyqty qamtý kórsetkishi 30 paıyzdy quraǵan. Juqtyrý qaýpi joǵary toptaǵy adamdarǵa vaksına aqysyz egilýde. Bul tizimge medısına qyzmetkerleri, júkti áıelder, 14 jasqa deıingi balalar jáne zeınetkerler kiredi eken.
