Ýkraınanyń quqyq qorǵaý organdary jeksenbi kúni Eýropalyq pen Táýelsizdik alańdaryna jınalǵan sherýshilerdi taratý úshin kóz jasaýratatyn gaz ben arnaıy qural qoldandy. Bul týraly ITAR-TASS habarlady.
Kıev mılısııasy baspasóz qyzmetiniń aqpary boıynsha, jergilikti ýaqytpen 23:00-de aıaqtalýy tıis bolǵan mıtıng toqtamaı jalǵasa bergen. Tártip saqshylary kósheni kólik qozǵalysyna ashý úshin adamdardy jaıaý júrginshiler jolyna yǵystyryp tastaǵan. Sol kezde olardyń arasynda qaqtyǵys oryn alyp, bir sherýshi men eki mılısııa qyzmetkeri japa shekken.
Ýkraınada úkimettiń Eýropa Odaǵymen qaýymdastyq qurý prosesin toqtatýlaryna jappaı narazylyq bildirý bastaldy. 22 qarasha kúni Kıevtegi táýelsizdik alańynda 1,5 myńǵa jýyq adam úkimet sheshimine narazylyq bildirgen edi. Olarǵa qoldaý kórsetý úshin «Batkıvshına» partııasynyń tóraǵasy Arsenıı Iаsenıýk, «Ýdar» partııasynyń tóraǵasy Vıtalıı Klıchko, «Svoboda» partııasynyń tóraǵasy Oleg Tıagnıbok pen burynǵy ishki ister mınıstri Iýrıı Lýsenko da kelgen bolatyn. Al keshe Kıevte eýroıntegrasııany jaqtaýshylardyń birneshe aksııalary bolyp ótti. Quqyq qorǵaý organdarynyń deregi boıynsha, aksııalarǵa 20 myńnan asa adam qatysqan. Al uıymdastyrýshylar bolsa kóshelerge 100 myńnan astam adam shyqqanyn alǵa tartady. Mundaı narazylyq aksııalary Ýkraınanyń basqa da qalalarynda bolyp ótti.
Aıdar О́risbaev.
Derekkóz: Itar-tass.com
