Astananyń mańyndaǵy №36 desanttyq-shabýyldaýshy brıgadasynyń bazasynda Qazaqstan Qarýly Kúshteri Qurlyq áskerleriniń bas qolbasshysy, general-leıtenant Murat Maıkeevtiń qatysýymen uıymdastyrý-ádistemelik jıyny bolyp ótti.
Astananyń mańyndaǵy №36 desanttyq-shabýyldaýshy brıgadasynyń bazasynda Qazaqstan Qarýly Kúshteri Qurlyq áskerleriniń bas qolbasshysy, general-leıtenant Murat Maıkeevtiń qatysýymen uıymdastyrý-ádistemelik jıyny bolyp ótti.
Atalǵan jıynda Qurlyq áskerleriniń barlyq áskerı bólimderi men quramalarynyń birinshi basshylary teorııa jáne fızıkalyq daıyndyqtary boıynsha synaq tapsyrdy. Sondaı-aq, aımaqtyq qolbasshylyqtar basqarý organdarynyń laýazymdy tulǵalarynyń qatysýymen komandalyq-shtabtyq oıyn jattyǵýlary ótkizilip, olardyń durys sheshim qabyldaı alatyn qabiletteri jan-jaqty tekserildi. Jedel qolbasshylyq ujymynyń árbir qabyldaǵan sheshimderi kartaǵa túsip jatsa, symsyz jeli olardy ortalyqpen baılanystyryp turdy.
Jalpy, áskerı oqý-jattyǵýlary boıynsha Áýeutqyr kúshteri jaqsy nátıje kórsetti. M.Maıkeevtiń aıtýynsha, kelesi jyldan bastap Bas shtab qolbasshysynyń buıryǵyna oraı barlyq kúsh rotalar men vzvodtardyń daıarlyǵyna jumyldyrylyp, olardyń derbes ári uıymdasqan áreketin qura bilýine baǵyttalatyn bolady. Sondaı-aq, kelesi jyly áýeutqyr kúshteriniń oqý-jattyǵýy nátıjesinde ózendi keship ótý arqyly 400 shaqyrym jerdegi soǵys aımaǵyna der kezinde jetý ýaqyty eńseriletin bolady.
Sonymen qatar, uıymdastyrý-ádistemelik jıyny barysynda Qurlyq áskerleri qolbasshysynyń áskerı daıyndyq boıynsha orynbasary, general-leıtenant Ámir Halıkovtiń jetekshiligimen Aqtaý teńiz jaıaý áskeri bazasynda nysanany múltiksiz atý jattyǵýlary ótkizildi. Jyljymaly nemese terbelmeli nysanalardy dáldep atý ońaıǵa túspedi. Áıtse de bul jattyǵýlardy oryndaýda sheberligimen tanylǵandar da jetkilikti boldy. Jalpy, munda polıgonda ótkizilýi tıis atý jattyǵýlary da oryndala beredi. Nysana men kózdeýshiniń arasy 100 metr bolǵanymen, nysanany barynsha kishireıtý arqyly 300 nemese 500 metrlik araqashyqtyqqa atý jattyǵýlary oryndalady. Mundaı atý oryndary ashyq aspan astynda jáne jabyq jaǵdaıda da uıymdastyrylady. Mysaly, jabyq tırde kúndizgi ýaqytta da túngi nysandy atýǵa múmkindik jasalǵan. Infraqyzyl sáýle atatyn nysanany kóz aldyńa anyq keltire qoıady. Jáne de atylǵan oqtardyń qanshalyqty nysanaǵa dóp tıip jatqanyn monıtordan baqylaýǵa múmkindik jasalady. Qazir mundaı tırler áskerı bólimderdiń kóbinde engizile bastaǵan.
Qurlyq áskerleri bas qolbasshysynyń tárbıe jónindegi orynbasary polkovnık Jumabek Hasenovtiń sózine qaraǵanda, osyndaı atý oryndaryn jetildirý arqyly ýaqyt pen oq-dárilerdi únemdeý 30-40 paıyzǵa jetken. Tırde serjant Sársenáli Batyrashevti sózge tartqan kezimizde, ol daladaǵy oq atý ornynda 40 adam buǵan eki saǵat jiberse, jabyq tırde osynshama adamǵa 20 mınýttyń ózi jetkilikti ekendigin alǵa tartty. Osylaısha, qurlyq áskerlerindegi oqý-jattyǵýlar jyldan-jylǵa jetildirilip kele jatqanyn erekshe aıta ketý kerek.
Asqar TURAPBAIULY,
«Egemen Qazaqstan».
