«Nur Otan» partııasynyń Ortalyq apparatynda partııalyq kýrator saraptama tobynyń «Jastardy qoldaý» baǵyty boıynsha otyrysy bolyp ótti. Oǵan saraptama tobynyń músheleri, Astana men Almaty qalalyq jáne oblystyq máslıhattar depýtattary, memlekettik organdardyń, memlekettik emes jastar uıymdarynyń ókilderi qatysty.
«Nur Otan» partııasynyń Ortalyq apparatynda partııalyq kýrator saraptama tobynyń «Jastardy qoldaý» baǵyty boıynsha otyrysy bolyp ótti. Oǵan saraptama tobynyń músheleri, Astana men Almaty qalalyq jáne oblystyq máslıhattar depýtattary, memlekettik organdardyń, memlekettik emes jastar uıymdarynyń ókilderi qatysty.
Otyrysqa Májilis depýtaty Meıram Begentaev jetekshilik jasasa, sarapshy toptyń músheleri quramynda palata depýtattary Aldan Smaıyl, Shalataı Myrzahmetov, Anatolıı Pepenın jáne Serik Ospanov boldy. Bul rette Elbasy, partııa Tóraǵasy Nursultan Nazarbaevtyń tapsyrmasymen 2012 jyly «Qazaqstan. 2017 maqsattary. Ulttyq is-qımyl jospary» Saılaýaldy tuǵyrnamasyn sapaly júzege asyrý maqsatynda «Nur Otan» partııasynyń fraksııasy músheleriniń sapynan Májiliste saılaýaldy tuǵyrnama baǵyttary boıynsha partııalyq kýratorlar anyqtalǵan-dy. Sarapshy top músheleri aldynda sóz alǵan Eńbek jáne halyqty áleýmettik qorǵaý mınıstrliginiń ókili qazirgi tańda jumyssyz júrgenderdiń 30 paıyzyn jastar quraıtyndyǵyna, olardyń mamandyǵy ne biliktiligi nemese eńbek daǵdysy joqtyǵyna nazar aýdartpaqqa tyrysty. Alaıda, top músheleri mundaı ýájben kelise qoıǵan joq. Olar bul rette eńbek naryǵyndaǵy mamandyqqa suranystar men bilim berý salasynyń arasynda baılanystyń áli kúnge ornamaı otyrǵanyna qynjylystaryn jasyrmady. Jastardy qorǵaı sóılegen Shalataı Myrzahmetov qazirgi jastardyń bilimi de, ómirge beıimdiligi de burynǵy kezeńmen salystyrǵanda áldeqaıda joǵary ekendigine toqtaldy. Bir ǵana mysal retinde, memlekettik qyzmetke ornalasýda bir jyldyq eńbek ótili bolýyn talap etetindigin alǵa tartqan ol, aldymen jas mamandy bir jyldyq eńbek tájirıbesinen ótkizý tetigin qarastyrý qajettigin erekshe atady.
Jastardyń basyndaǵy qıynshylyqtardy sóz etken Májilis depýtaty, saraptama tobynyń múshesi Aldan Smaıyl olardy sheshý úshin respýblıkalyq derbes jastar agenttigi qurylýy qajettigin jetkizdi. «Mınıstrliktiń janynda otyrǵan komıtet óz betimen birnárse sheshe alady dep oılamaımyn. Ol vıse-mınıstrge de, jaýapty hatshyǵa da, mınıstrge de baǵynyshty. Qalaı bolǵanda da, solardyń yqpalynda ketedi», dedi A.Smaıyl.
Depýtattyń paıymynsha, memlekettik grant berilgen jastardy jumysqa ornalastyrýǵa memleket jaýapty bolýy kerek. «Memleket aqsha berip, 5 jyl oqytty. Sodan keıin «júgenin sypyryp» qoıa berýi kerek pe? Bizge memlekettik grantpen oqyǵan jastar mindetti túrde jumysqa ornalassyn degen zań qajet. «Halyqty jumyspen qamtý týraly» zań ázirlenip jatyr eken. Sol zańǵa osyndaı norma engizý kerek», dedi top múshesi. Sonymen qatar, depýtat mamandar daıarlap jatqan jekemenshik oqý oryndarynyń jaýapkershiligin kúsheıtý qajettigin de basa aıtty.
Jalpy, otyrys barysynda jastardy eńbekke ornalastyrýdyń qyr-syry jan-jaqty talqylanýmen qatar, jastar saıasaty salasyndaǵy 2014 jylǵa arnalǵan oblystyq bıýdjetti qurý jáne jastar uıymdary jumysynyń jelilik kestesin qalyptastyrý máseleleri qaraldy. Sondaı-aq, on-laın rejiminde jastar arasynda otyrǵan áleýmettik-ekonomıkalyq máselelerdi ýaqytynda aıqyndap, taldaý jáne memlekettik jastar saıasatyn tıimdi júzege asyrýǵa naqty usynystar jasaıtyn óńirlik jastar saıasaty máseleleri basqarmalarynyń jetekshileri baılanysqa shyǵyp, óz oılaryn ortaǵa salyp otyrdy.
Halyqaralyq tájirıbelermen qosa, sarapshy top otandyq sarapshylardy da osy máselege jumyldyrý qajettigine, tipti, qajet bolsa, jumyssyz jastardyń ózin sebebin bilmek úshin áńgimege tartýǵa shaqyrdy. Otyrys barysynda birqatar usynymdar qabyldanyp, endi olar tıisti jerlerge joldanatyn bolady.
Asqar TURAPBAIULY,
«Egemen Qazaqstan».
