О́rken Bısaqaev 2020 jyldyń shildesinen bastap aımaqta kelýshilerdiń kóbeıgeni baıqalatynyn jáne bul týrızmdi damytýdyń keleshegi zor ekenin aıtyp ótti.
"Búginde Rixos qonaqúıinen basqa tanymal baǵyttardyń biri Bozjyra shatqaly. Bizdiń esepteýimizshe, kelýshiler sany ótken jylmen salystyrǵanda kem degende 10 esege ósken. Onda keminde 2000 adam barǵan. Kelesi jylǵa boljam: Bozjyra aımaǵyna keminde 10 000 adam kelýi kerek", dedi О́rken Bısaqaev jumys sapary aıasynda.
Vıse-mınıstr Bozjyra shatqalynda ınfraqurylymdy retke keltirý men ondaǵy týrısterdiń tynys-tirshiligi men qaýipsizdigi máselelerin sheshý boıynsha sharalar keshenin qamtamasyz etý talap etiletinin atap ótti.
"Bozjyra jerindegi qurylys máselesi qoǵamdyq talqydan, ekologııalyq saraptamadan, onyń ishinde qorshaǵan ortaǵa áserin baǵalaý jumystarynan ótýi tıis. Qazirgi tańda qonaqúı qurylysy josparlanbaǵan, birde-bir tujyrymdama bekitilgen joq", dep túıindedi О́rken Bısaqaev
О́rken Bısaqaev jaǵdaıdy túsindirip, ekonomıkalyq qajettilikter men ekologııalyq prosesterdi saqtaý arasyndaǵy teńgerim mańyzdy ekenin atap ótti.
"Bozjyra aýmaǵyn qarap shyqqanda, onda qozǵalys múldem erkin ekenin, ıaǵnı adamdar men avtokólik erkin júre alatynyn jáne jer bederi qandaı da bir arnaıy daıyndyqty talap etpeıtinin kórdik. Bizdiń oıymyzsha, jergilikti aýdanǵa adamdar kóp kele bastaǵanda aımaqqa qaýip tónedi. Taýdyń ózi emes, topyraqtyń ereksheligine baılanysty ásirese irgeles turǵan bóligi osal bolýy múmkin. Sondyqtan kelýshilerdiń aǵynyn rettep, basqarý úshin týrısterdi Bozjyra taýyna jaqyn jerde qabyldaıtyn týrıstik obektiler men avtokólikterdiń qozǵalysy úshin joldar qajet", deıdi vıse-mınıstr.
Bozjyra "Jabaı ushqan" jergilikti mańyzy bar qoryqshasynyń aýmaǵynda ornalasqan. "Jabaı ushqan" Mańǵystaý oblysy ákiminiń 2012 jylǵy qaýlysyna sáıkes qurylǵan jáne oblystyń tabıǵı resýrstar jáne tabıǵat paıdalaný basqarmasynyń "Qyzylsaı" memlekettik óńirlik tabıǵı parkine jatady.
