Chernogorııa quramasyn qaıdam, bul kezdeýde jerlesterimiz úshin jeńis emes, aldaǵy jaýapty oıyn aldynda oıyn tájirıbesi men fýtbolshylardy bir tekserip alý asa mańyzdy boldy. Al jeńis – ekinshi orynda turdy. Dese de qarsylastan basym túsý kimniń taqııasyna tar kelsin!. Biraq bas bapker úshin eń bastysy – maqsattyń oryndalǵany kerek edi. Sol úshin de Mıhal Bılek jasyl alańǵa negizgi emes, komandaǵa endi ǵana shaqyrylǵan aralas quramdy shyǵardy. Sóıtip keıbir fýtbolshylarǵa ózin kórsetýge múmkindik, al quramnyń ózge oıynshylaryna demalys berdi. Onysy da durys shyǵar, óıtkeni mańyzdy oıyn aldynda jaraqat alyp qalýy da ábden múmkin.
Sonymen keshegi oıynda Bılek kimderdi synaqtan ótkizdi? Eń aldymen qaqpashy – Dmıtro Nepogodov. Cheh mamany «Astanany» jattyqtyrǵanda Nepogodovty qatarynan úsh oıynda qaqpany senip tapsyrdy. Alaıda úsh kezdesýde qaqpasyna 5 gol ótkizip alǵan soń, ony qaıta qosalqy quramǵa otyrǵyzyp qoıdy. Tipti Ulttar lıgasynyń birde-bir oıynynda alańǵa shyǵarǵan joq. Sondyqtan osy matchta «Astana» qaqpashysyna óziniń negizgi quramda óner kórsetýge áleýeti tolyq jetetinin kórsetýge múmkindik berdi. Jáne ol bas bapkerdiń senim údesinen shyǵa bildi dep oılaımyz. Sebebi, qaqpasyna gol ótkizgen joq jáne gol soǵatyn birneshe sátte seıv jasap, komandasyn jeńilisten qutqaryp qaldy.
Sondaı-aq bir jyldyq úzilisten soń quramaǵa qaıta oralǵan qorǵaýshy Iýrıı Logvınenko, jartylaı qorǵaýshy Aslan Darabaev, shabýylshylar Toqtar Jańǵylyshbaı, Alekseı Shetkın jáne Sergeı Hıjnıchenko sekildi fýtbolshylar birinshi mınýttan bastap óner kórsetti. Qorǵaýshylar qaqpaǵa gol ótkizbegenin eskersek, táp-táýir oıyn órnegin kórsetti dep aıta alamyz. Shabýylshylar gol soqpasa da, birneshe qaýipti sát jasaı aldy. Tipti birinshi taımnyń 15-mınýtynda Sergeı Hıjnıchenko gol soqqan bolatyn, alaıda tóreshi gol oıynnan tys jaǵdaıda soǵyldy dep eseptemeı tastady. Sonymen qatar birinshi taımda Marat Bystrovtyń da gol soǵatyn tamasha eki múmkindigi bolǵan. О́kinishke qaraı, ekeýinde de dopty qaqpaǵa engize almady. Jalpy oıyn deńgeıi tablodaǵy esepke saı boldy desek, artyq aıtqandyq emes shyǵar.
Eki qurama buǵan deıin jasyl alańda úsh ret kezdesip, úsheýinde de Chernogorııa quramasy jeńiske jetken bolatyn. Tórtinshi oıynda Qazaqstan quramasy teń nátıje kórsetip, jeńilis serııasyna núkte qoıdy.
Kezdesýden keıin Mıhal Bılek baspasóz máslıhatynda Chernogorııamen ótken joldastyq kezdesýdiń nátıjesi týraly pikirin ortaǵa salyp, shákirtteri óte jaqsy match ótkizgenin aıtty. «Búgin tártipti, uıymshyl ári sapaly oıyn kórsettik. Gol soǵatyn birneshe múmkindigimiz bolǵanymen, ony júzege asyra almadyq. Birinshi taım óte jaqsy ótti. Bizdiń oıynshylar kóp pressıng jasap, dopty jıi tartyp alyp, jyldam shabýyldar jasady. Ekinshi taımda qarsylas qysym jasaı bastady. Biraq meniń oıynshylarym tabandylyq tanytty. Tórt kúnnen keıin bizdi Albanııa quramasymen mańyzdy match kútip tur. Sodan keıin lıtvalyqtarmen úıde oınaımyz. Sondyqtan búgin keıbir fýtbolshylar oınaǵan joq», dedi ol.
Endi jerlesterimiz 15 qarashada syrt alańda Albanııa quramasymen, 18 qarashada Ortalyq stadıonda Lıtva fýtbolshylarymen oınaıdy. Aıta keteıik, bizdiń toptaǵy týrnır kestesinde 7 upaıy bar Belarýs quramasy birinshi orynda keledi. Bes-bes upaıdan ıelengen Lıtva men Albanııa ekinshi jáne úshinshi oryndy bólisip tur. Al Qazaqstan quramasy 4 upaımen toptaǵy sońǵy tórtinshi orynda qalyp qoıdy.
