Qonaqtar 25 metrlik basseın, oıyn zaly men 278 orynǵa arnalǵan jataqhana jumysymen tanysty. Sonymen qatar, tolyq sporttyq-jattyǵý kesheni sanalatyn dzıýdo Akademııasynyń jumysyn kórdi. Akademııa janynda 89 adamǵa arnalǵan qonaq úı, 40 adamǵa arnalǵan ashana, barlyq halyqaralyq talaptarǵa saı keletin dzıýdo, semserlesý zaldary bar.
Olımpıada Komıtetiniń basshysy atalǵan Akademııanyń sporttyq rezervti daıarlaýdaǵy mańyzdylyǵyn ataı kele, bolashaq chempıondardy qoldap, osyndaı zal syılaǵan mesenat Keńes Raqyshevqa alǵys bildirdi. Esterińizge salaıyq, 2016 jyly Respýblıkalyq dzıýdo federasııasynyń qoldaýymen elimizde alǵashqy dzıýdo Akademııasy ashyldy. 2017 jyldan beri ol Kárken Ahmetov atyndaǵy Respýblıkalyq sporttyq mektep-ınternat-kolledjiniń basqarýyna berildi. Budan basqa, qonaqtarǵa Ulttyq semserlesý Federasııasynyń Prezıdenti Mırbolat Ábýovtiń qoldaýymen jóndeý júrgizilgen semserlesý zaly kórsetildi. Jasalǵan jumystardyń barysy týraly Qazaqstan Respýblıkasy Mádenıet jáne sport vıse-mınıstri Sáken Musaıbekov aıtyp berdi.
Kezdesý sońynda Tımýr Qulybaev jáne Qaırat Boranbaev mektep-ınternat-kolledjdiń oqýshylaryna ınteraktıvti taqtalardy syıǵa tartty. Sonymen qatar, Tımýr Qulybaev Sportshylardyń dopıngke qarsy zerthanasynyń jumysymen tanysty. Búginde atalǵan uıym óz jumysyn Dúnıejúzilik Dopıngke qarsy Agenttik (WADA) talaptaryna saı júrgizip, WADA lısenzııasyn qaıtarý boıynsha jumystardy jasap jatyr. Aıta keteıik, akkredıtasııany qaıtarý maqsatynda zerthana jol kartasyn jasap, sonyń aıasynda jańa qural-jabdyqtar alyp, jeke turǵan ǵımaratqa kóshti. Sondaı-aq, 2020 jyldyń 1 qańtarynan zerthana qyzmetkerleriniń jalaqysy eki ese ósti.
Budan basqa, tıym salynǵan ádister men preparattardy jyldam anyqtaý úshin zerthana mamandary ǵylymı-zertteý jumystarymen aınalysyp, turaqty túrde biliktilikti arttyrý semınarlaryna qatysady. UOK Prezıdenti jasalǵan jumystarǵa oń baǵa berip, zerthana qyzmetkerleriniń biliktiligin arttyrýǵa, WADA lısenzııasyn qaıtarý jolynda jasalyp jatqan jumystardy belsendi etýge, Qazaqstan Respýblıkasy ulttyq qurama komandalardyń keshendi-ǵylymı toptarymen birlesip jumys jasaýǵa asa kóńil bólý qajettigin taǵy da nazarǵa aldy.
Esterińizge salaıyq, 2018 jyldyń 22 qarashasynda WADA uıymynyń Atqarýshy Komıtetiniń sheshimimen Sportshylardyń Dopıngke qarsy zerthanasy WADA laboratorııalarynyń akkredıtasııasyn alýǵa úmitker retinde tanyldy.
