Jobamen Nazarbaev Ýnıversıtettiń Aqyldy júıeler men jasandy ıntellekt ınstıtýtynyń mamandary professor Hýseın Atakan Varoldyń jetekshiligimen shuǵyldanýda.
– Bul jobanyń maqsaty – alys jerde bolǵan tótenshe jaǵdaılardy, mysaly órtti, kólik apattaryn, tabıǵı apattardy jáne basqalaryn barynsha tez anyqtaý. Qaladaǵy bıik ǵımarattar kóp aýdandardy, ne bolmasa qaltarys jerleri kóp jerlerdiń ózin kórip, qadaǵalap otyrý qaýipsizdikti qamtamasyz etýde sheshýshi ról atqarady. Beınekameralar TJ nemese tabıǵı apat bola qalǵan jaǵdaıda ony tez baıqap, avtomatty túrde belgi beredi, sol arqyly órt sóndirýshiler men jedel járdemniń, sonymen qatar polısııanyń jumysyn ońtaılandyrady. – deıdi jobanyń ǵylymı qyzmetkeri Aqnur Qarabaı.
Qazir ǵalymdar qashyqtan zondtaý spýtnıkteri men ushqyshsyz basqarylatyn qondyrǵylardyń kómegimen túsirilgen derekter negizinde bas qalanyń sıfrly kóshirmesin jasaýda. Sol arqyly qalanyń barlyq bólikterin egjeı-tegjeıli zertteýge múmkindik týady, jasandy ıntellekt sonyń negizinde qashyqtan túsiretin beınekameralardy ornatý úshin elordanyń barlyq aýdandaryn neǵurlym keńirek qamtıtyn jerlerdi anyqtaıdy.
Jas ǵalym A.Qarabaıdyń aıtýynsha, Nur-Sultandy túgel qamtý úshin júzdegen kamera ornatýdyń qajeti joq. Eń tıimdi degen jerlerge ornatylǵan 5 kameranyń ózi qala terrıtorııasynyń 30 paıyzyn qamtı alady. Sebebi, qashyqtan túsiretin kamerany túrli baǵytqa buryp otyryp onyń túsirilim aýmaǵyn da anaǵurlym keńeıtýge bolady. Ǵalymdar neǵurlym az kameramen barynsha keń aýmaqty qamtýǵa tyrysýda.
Halyqtyń ómiri men densaýlyǵyn saqtaýǵa baǵyttalǵan joba bolǵandyqtan ony júzege asyrý kezinde qatelesýge bolmaıtyny túsinikti. Sol sebepti ǵalymdar ony testileýge de erekshe mańyz berip otyr.
– Qalanyń 3D kartasynyń modelin paıdalanamyz. Kameralar onalasqan jerlerge oraı alynǵan beınematerıal men onyń ólshemderi negizinde modeldiń paıdalanýǵa qanshalyqty daıyn ekendigi anyqtalady, – deıdi A.Qarabaı.
Tengrinews.kz habarlaǵandaı, ádette mundaı jobany júzege asyrý óte qymbatqa túsedi ári kóp ýaqytty qajet etedi. Degenmen, Nazarbaev Ýnıversıtettiń ǵalymdary aldaǵy jyldyń alǵashqy jartysynda jobany tolyqqandy aıaqtaýdy josparlap otyr.
