Qazaqstan quramasy úshin Albanııada 3 upaı oljalaý óte mańyzdy edi. О́ıtkeni jerlesterimiz týrnır kestesinde sońǵy orynda kele jatsa da, keıingi eki oıynda jeńiske jetse, kósh bastaýǵa múmkindigi bolǵan-dy. Osyny eskergen Qazaqstan fýtbol federasııasynyń basshylyǵy Albanııamen óter match aldynda oıyn máneri uqsas Chernogorııa quramasymen joldastyq kezdesý uıymdastyrdy. Podgorısada aralas qurammen jasyl alań qojaıyndarymen teń oınaǵan jerlesterimiz Tıranaǵa kóterińki kóńil-kúımen keldi.
Chernogorııamen ótken oıynda qoldanǵan 3-5-2 taktıkasy nátıje bergen soń, Mıhal Bılek Albanııa qurmasyna qarsy dál osy taktıkany qoldandy, biraq alańǵa múlde jańa fýtbolshylardy shyǵardy. Bas bapker meılinshe qorǵanysqa kóp kóńil bólgen bolsa da, kezdesýdiń alǵashqy 15-mınýtyna deıin fýtbolshylarymyz shabýyldaýmen boldy. Ǵafýrjan Súıimbaev pen bir aı burynǵy matchqa qatysa almaǵan Iаn Vorgovskıı qarsylasty qos qaptaldan qyspaqqa alyp, shabýylshylarymyz albandyq qaqpashy Berıshany biraz sastyrdy.
Alaıda tez es jıyp úlgergen Albanııa fýtbolshylary 16-mınýtta esep ashty. Ledıan Memýshaıdyń aıyp alańyna asyrǵan dobyna bizdiń qorǵaýshylarǵa qaraǵanda birinshi bolyp jetken Sokol Chıkalleshı baspen gol soǵyp, komandasyn esepte alǵa shyǵardy. Budan keıin de shabýylyn toqtatpaǵan albanııalyqtar Stas Pokatılov qorǵaǵan qaqpany biraz torýyldady. Nátıjesinde Ardıan Ismaılı 23-mınýtta standartty jaǵdaıda quramasynyń ekinshi golyn soqty. Alań qojaıyndarynyń qaqpaǵa baǵyttaǵan dobyn judyryǵymen qaǵyp jibergen Pokatılov abaısyzda dopty qarsylas fýtbolshynyń aıaǵyna salyp berdi. Qaqpashy men qorǵaýshylardyń qateligin tıimdi paıdalanǵan Ismaılı gol soǵýda múlt ketken joq. Dál osyndaı gol soǵylatyn qarbalas sát ekinshi taımda da bizdiń qaqpa mańynda oryn aldy. Abyroı bolǵanda ol jaǵdaıda qorǵaýshy Nuraly Álip dopty qaıtaryp, qaqpamyzdy 100 paıyzdyq goldan qutqaryp qaldy.
Albanııanyń birinshi taımda soqqan eki golyna jerlesterimiz jyldam jaýap berdi. Dopty alań ortasynan jyldam oıynǵa qosyp, sol ýaqytta Berıshanyń qaqpasynan alystap ketkenin baıqaǵan Aıbol Ábiken dopty dál qaqpaǵa ortalyq alańnan baǵyttap, esep aıyrmasyn qysqartty. Sóıtip kezdesýdiń birinshi bóligi 2:1 nátıjesimen aıaqtaldy.
Ekinshi taımda Mıhal Bılek alańǵa tyńnan oıynshylar qosqanymen, olar quramany jeńilisten qutqaryp qala almady. 60-mınýtta Aleksandr Marochkın qaqpa aldyndaǵy qarbalasta qatelesip qana qoımaı, qarsylas fýtbolshyǵa qarsy tártip buzyp, tóreshi esh oılanbastan bizdiń qaqpaǵa 11 metrlik aıyp dobyn belgiledi. Penaltıdi sátti oryndaǵan Reı Manaı esepti 3:1-ge jetkizdi. Ekinshi taımda da Qazaqstan quramasynyń esep aıyrmasyn qysqartatyn múmkindigi bolǵan edi. Alaıda Ǵafýrjan Súıimbaev bos qalǵan qaqpaǵa gol soǵa almady. Kezdesý sońyna deıin esep ózgermeı, 3:1 esebi saqtalyp qaldy.
Matchtan keıin oıyn týraly pikir bildirgen bas bapker Mıhal Bılek kezdesýdiń qıyn ótkenin aıtty. «Búgingi oıynda úsh gol ótkizip alǵanymyz óte ókinishti. Ekinshi taımda esep aıyrmasyn qysqartatyn múmkindik Súıimbaev pen Vorgovskııde bolǵan edi. О́kinishke qaraı, ekeýi de gol soǵa almady. Eger bireýi gol soǵyp, tablodaǵy esep 3:2 bolǵanda teń nátıjege qol jetkizýimizge de bolar ma edi. Dese de Albanııa búgin jınaqy, uıymdasqan fýtbol kórsetti. Jyldamdyq jaǵynan da, dopty baqylaý jaǵynan da bizden bir bas joǵary turdy. Bul biz úshin óte qıyn match boldy. Kelesi matchqa deıin qalpymyzǵa kelý úshin úsh kúndeı ýaqyt bar. Lıtvamen ótetin kezdesý biz úshin óte mańyzdy ekenin barlyǵymyz jaqsy túsinemiz. Sondyqtan óz alańymyzda tek jeńis úshin oınaımyz», dedi M.Bılek.
Osylaısha bes oıynnyń úsheýinde jeńilgen Qazaqstan quramasynyń topta birinshi oryn alý múmkindiginen túbegeıli aıyrylǵany bylaı tursyn, kelesi jyly D dıvızıonyna túsip qalý qaýpi týyndady. Eger 18 qarashada óz alańymyzda ótetin oıynda Lıtvany jeńe almasaq, onda Ulttar lıgasynyń aldaǵy maýsymynda Andorra, Malta, San-Marıno, Lıhtenshteın sekildi quramalarǵa qarsylas atanamyz.
