Evgenıı Egemberdıev – kópten beri kózge túsip júrgen saqa sportshy. Kezinde ol bokstan jastar arasyndaǵy álem birinshiliginiń kúmis júldegeri atandy. Keıinnen aralas jekpe-jekke myqtap den qoıyp, birqatar baıraqty básekede kúsh synasty. Osy kúnge deıin resmı túrde 12 jekpe-jek ótkizip, 9 ret jeńiske jetti. Taraz óńiriniń týmasy qazirgi kezde jartylaı aýyr salmaqta ASA reıtınginde tórtinshi satyǵa jaıǵasqan. Evgenıı bul jarysta Lıýk Barnattpen aıqasady. Ulybrıtanııanyń ókili oktagonda 27 kezdesý ótkizip, 17 ret basymdyq tanytqan. Kezinde Barnatt álemniń eń úzdik promoýsheni – UFC-de baq synaǵan.
Nursultan Qasymhanov ta sońǵy kezderi óreli ónerimen kózge túsip júrgen jalyndy jastardyń biri. Byltyrǵy jyldyń qońyr kúzinde Almatyda ótken ASA jarysynda qazaqstandyq sportshylar tegisteı utylǵanda dáp osy qazaqtyń qaısar uly ǵana qarsylasyn kókala qoıdaı etip sabap, aıqyn jeńiske qol jetkizdi. Sol kezden bastap Nursultanǵa degen jankúıerlerdiń yqylasy erekshe. Aıqas alańynda barlyǵy 10 kezdesý ótkizgen Jetisý óńiri óreniniń 8 márte mereıi ústem boldy. Qasymhanov aıtýly jarysta Alıhan Sýleımanovpen sheberlik baıqasady. Cheshenstannyń týmasy 13 básekeniń tek úsheýinde ǵana utylǵan.
Al osy jarystaǵy basty jekpe-jek Reseıdiń eki sportshysy – Magomed Ismaılov pen Ivan Shtyrkov arasynda ótedi. Olardyń ekeýi de nebir myqtylardy utyp, jankúıerler júregin áldeqashan jaýlaǵan jaýyngerler. Máselen, Ismaılov bıyl atyshýly Aleksandr Emelıanenkony ońdyrmaı sabasa, Shtrykov Tıago Sılva, Fabıo Maldonado, Antonıo Sılva syndy sańlaqtardan basym tústi.
