Úkimet tarapynan júıe deńgeıde qoldaý tapqan baǵdarlamanyń jýyrda alǵashqy qanatqaqty jobasy uıymdastyryldy. Jobaǵa Aqmola, Jambyl oblysy jáne Nur-Sultan men Almaty qalasynyń 6-8 synypta oqıtyn 555 oqýshy qatysty. Úsh negizgi baǵyt tańdalyp, qatysýshylarǵa tarıh, fızıka jáne bıologııa páni boıynsha sabaqtar uıymdastyryldy. Týrıstik sala ókilderi mektep baǵdarlamasy sheńberindegi ekskýrsııalar oqý baǵdarlamasyn túrlendirip qana qoımaı, balalardy erte jastan týrızmge beıimdeıdi degen oıda.
Kazakh Tourism UK AQ basqarma tóraǵasy Erjan Erkinbaev pandemııaǵa baılanysty sabaqqa qatysatyn balalardyń sany 15-ke deıin qysqarǵanyn, týrlar oblys aýmaǵynda júrgizilip jatqanyn aıtty.
«Bastapqyda biz Reseıdiń «Jıvye ýrokı» jobasyn negizge aldyq, onda mektep oqýshylary bir óńirden ekinshi óńirge saıahat jasaıdy. Bul týǵan jerdi tanýda paıdaly tájirıbe, ekskýrsııalarda balalar «durys» týrıst bolyp úırene alar edi. Bala tabıǵatty lastamaý, órt shyǵýyna, aǵashtardyń shabylýyna sebepshi bolmaýyn túsinip, qorshaǵan ortany qorǵap, jaqsartýdy úırenedi. Biraq pandemııa bul josparymyzdy tolyq júzege asyrýǵa múmkindik bergen joq. Sondyqtan bıýdjettiń basym bóligi balalardyń qaýipsizdigin qamtamasyz etý maqsatynda qorǵanysh quraldaryna jumsaldy», dedi Erjan Erkinbaev.
Nur-Sultanda qashyqtan oqytý arqyly alynǵan bilim temirjol personalyn baǵalaý jáne damytý jónindegi oqý ortalyǵynda jáne balamaly energııa kózderiniń jumys isteý prınsıpterin kórsetetin «Nur Álem» bolashaq energetıkalyq mýzeıinde bekitildi.
Oqý ortalyǵynda 8-synyp oqýshylary teplovoz qozǵaltqyshy, týrbokompressor jumysymen tanysyp, sılındr qozǵalysynyń qaǵıdatyn bildi. Balalar arnaıy trenajerlar, kabınalarǵa minip, mashınıst, mashınıst kómekshisi bolyp ta kórdi. «Osy baǵdarlama úshin uıymdastyrýshylarǵa erekshe alǵysymdy bildiremin. Men bul jerden kóp nárse úırendim. Tehnıka jumysymen tanystym. Aldaǵy ýaqytta da jobanyń turaqty qatysýshysy bolamyz degen úmittemin», dedi ekskýrsııaǵa qatysýshy.
«Balalarǵa baǵdarlama qatty unady, olar fızıkadan bólek kásiptik baǵdar boıynsha sabaq ótti. Kóbisi bolashaqta mashınıst mamandyǵymen jaqynyraq tanysýǵa ynta tanytty. Sabaqtardy ótkizýde eń mańyzdysy – mektep baǵdarlamasymen ekskýrsııany josparlaı alatyn jaqsy gıd tabý. Bul másele boıynsha biz birneshe mekteptiń muǵalimderimen keńesip, sonyń arqasynda saıahatqa laıyqty nysandardy tańdadyq», dedi Gvidon Tour týrıstik agenttiktiń baǵdarlamalar menedjeri Ekaterına Býlda.
«Aýyl balalaryna jobaǵa qatysýǵa múmkindik bergen uıymdastyrýshylarǵa rızamyn. Balamnyń alǵan áseri mol. Mundaı jobalar balanyń oı órisin keńeıtip, pánderdi is júzinde ıgerýge múmkindik beredi. Bizge mamandyq tańdaýǵa kómektesedi. Mundaı jobalar kóp bolýy kerek dep esepteımin», dedi jobaǵa qatysqan Polına Mamedovanyń anasy.
Almaty qalasyndaǵy jobaǵa bıologııa páni boıynsha qatysýǵa Almaty oblysy mektepteriniń 195 úzdik oqýshysy iriktelip alyndy. Aıta ketý kerek, osy óńirde sany 10 adamnan aspaıtyn toptar jasaqtaldy. Bıologııa páni eldegi eń iri zoobaqtyń birinde ótip, onda balalar janýarlar álemimen tanysyp, qorektený tizbegi jaıynda kóp aqparat aldy.
Al Jambyl oblysyndaǵy 6-synyp oqýshylary Qazaqstan tarıhymen keńinen tanysty. Ekskýrsııa barysynda balalar Qarahan men Aısha bıbi kesenesine baryp, kóne Taraz qazba jumystaryn tamashalady.
«Tarıhı oryndardy aralaý kezinde balalar kóptegen paıdaly aqparat aldy. Balalar oqýlyqtardan oqyǵandaryn óz kózimen kórip-bilse, oqý prosesi tıimdi bolatynyna kóz jetkizdik. «Jandy sabaqtar» jobasynyń jalǵasy bolady dep úmittenemiz», dedi Jambyl oblysyndaǵy orta mekteptiń tarıh pániniń muǵalimi Dıdar Serkebaeva.
«Oqýshylar Qarahanıdter memleketiniń murasyn kórdi. Bul taqyrypty balalar 6-synypta oqıdy. Ashyq aspan astyndaǵy tarıhpen tanysqan balalar dán rıza. Osylaısha olardyń boıynda patrıottyq sezimi oıanyp, týǵan ólkege degen qyzyǵýshylyq artady», dedi «Zolotoı karavan» týrıstik ortalyǵynyń dırektory Albına Veımer.
«Atameken» Ulttyq kásipkerler palatasy týrızm departamentiniń dırektory Damılıa Qunanova jobany júzege asyrý turǵyndar úshin qosymsha týrıstik ónimdi qalyptastyratynyn jáne bolashaq týrısterdiń ekologııalyq tárbıesine yqpal etetindigin atap ótti. Ekskýrsııalar eldegi óndiristik týrızmdi damytýǵa bastama bola alady.
Qanatqaqty joba aıaqtalǵan soń Kazakh Tourism AQ bıznes-qoǵamdastyq jáne UKP-men birlesip «Jandy sabaqtar» jobasyn basqa óńirlerde iske asyratynyn jetkizdi.
