Jarystyń shymyldyǵyn erkin kúres sheberleri ashady. Olar 10 salmaq dárejesiniń júldelerin sarapqa salady. 57 kg salmaq dárejesindegi balýandardyń deńgeıleri birdeı. Olardyń arasynan eshkimdi bóle-jara ataı almaımyz. Esesine, 61 kg salmaqtaǵy tartys qyzyqty ótedi degen oıdamyz. Negizgi básekelestik Nurıslam Sanaev pen Rasýl Qalıev arasynda ótýge tıis. Ekeýi de 29 jasta. Qandasymyzǵa qaraǵanda Tyvadan kelgen jigittiń ataq-dańqy áldeqaıda zor ekeni málim. 2018 jyly Býdapeshte ótken álem chempıonatynda kúmis medaldy enshilegen ol 2019 jyly Nur-Sultanda qolaǵa qol sozdy. Azııa chempıony degen ataǵy taǵy bar. Alaıda Rasýldyń da «óz aıtary» bar. Ol da – Azııa birinshiliginiń jeńimpazy. Inchhonda alaýy tutanǵan Azııa oıyndarynyń kúmis júldegeri. Tegin balýannyń ondaı dárejege jetpeıtini anyq. Onyń ústine, osydan birer jyl buryn jaýapty jarystardyń birinde Qalıevtiń Sanaevty san soqtyryp ketkeni esimizde. Eger bas júlde úshin talas osy qos sańlaq arasynda ótip, qalǵandary syrttan baqylap otyrady dep oılasańyzdar, qatelesesizder. Bul salmaqta Adlan Asqarov esimdi daryndy óren bar. Jas jolbarys ózi quralyptas balýandar arasyndaǵy álemdik deńgeıdegi jarystardy tegisteı utyp, jankúıerlerdiń kózaıymyna aınaldy. Byltyr 23 jasqa deıingiler arasyndaǵy álem birinshiliginde 19 jastaǵy Adlan kúmis medaldy moınyna ildi. Osy jaıttyń barlyǵy bul jigittiń shynaıy áleýetin baıqatsa kerek.
65 kg salmaqta Dáýlet Nııazbekovtiń shoqtyǵy bıik. 31 jastaǵy Syr boıynyń sańlaǵy álem chempıonatynyń eki dúrkin júldegeri, Azııanyń úsh dúrkin chempıony jáne sol jarystyń tórt dúrkin qola júldegeri degen ataqtary bar. Almatydaǵy dodada Dáýlettiń basty qarsylasy – Saıatbek Oqasov. 29 jastaǵy Pavlodar oblysynyń týmasy – Azııa oıyndary men chempıonatynda jeńis tuǵyryna kóterilgen saqa sportshy.
Jankúıerler 70 kg salmaqtaǵy Meıirjan Áshirov pen Amandyq Bakeev arasyndaǵy tartysty taǵatsyzdana kútýde. Buǵan deıin bir-birin alma-kezek utyp júrgen saıypqyrandar osy joly kimniń shyn myqty ekenin anyqtaıdy. Al 74 kg salmaq dárejesinde kúsh synasatyndar shetinen «sen tur, men ataıyndar». Olar – Nurlan Bekjanov, Nurqoja Qaıpanov jáne Danııar Qaısanov. Úsheýi de álem chempıonatynyń júldegeri atanǵan apaıtóster. Nurlan bul ataqqa 2016 jyly Býdapeshtte qol jetkizdi. 2019 jyly Nur-Sultanda ótken dodada Nurqoja kúmis alsa, Danııar qola medaldy moınyna ildi. Biraq ol kezde Qaıpanov 70 kg salmaqta kúresken edi. Odan bólek, esimderi atalǵan órenderdiń barlyǵy da qurlyqtyq deńgeıdegi jarystarda jasyndaı jarqyldady.
79 kg salmaqtyń favorıti Ǵalymjan О́serbaev ekeni sózsiz. Olımpııa oıyndary men Álem chempıonatynda besinshi orynǵa taban tirep, birqatar halyqaralyq dodada júldegerler sanatyna qosylǵan sańlaqty tuǵyrdan taıdyrý úshin Meıir Kóshkenbaev pen Bolat Sataev syndy jastar baryn salýǵa tıis.
86 kg salmaqta Azamat Dáýletbekovtiń qarqyny kúshti. 26 jastaǵy Semeı óńiriniń týmasy Azııa chempıonatynda eki márte jeńis tuǵyryna kóterildi. Onyń syralǵy qarsylasy Ádilet Daýlynbaev bul jarysqa qatyspaıdy. Biraq soǵan bola Azamat bosańsymaý kerek. О́ıtkeni qazirgi kezde Esqalı Dáýletqazy men Baqtııar Izbasarov bastaǵan bir top jas órenniń tegeýrini kúshti.
92 kg salmaqta Nurǵalı Nurǵaıypuly men Ilıshan Chılaevty ótap ótýge bolady. 97 kg salmaqta Erǵalı Álisher men Mámed Ibragımov bar. Al 125 kg salmaq dárejesinde aıqasatyn úsh alyptyń básekesi kórermender kóńilinen shyǵatynyna senimdimiz. Olar – Oleg Boltın, Ińkár Ermuhambet jáne Iýsýp Batyrmurzaev.
Mine, erkin kúres sheberleri arasyndaǵy jarystyń basty favorıtteri osylar. Biraq bir shoǵyr jas jolbarys olardyń izin basyp, ósip kele jatqanyn da esten shyǵarmaıyq. Olardyń da óz josparlary, kózdegen maqsattary bar. Sol sebepti bizdikin tek joramal dep qabyldańyzdar. Al solardyń arasynan kimniń myqty ekenin boz kilemdegi «jan alysyp, jan berisken» beldesýler anyqtaıdy.
ALMATY
