Saıasat • 21 Qarasha, 2020

Shvesııanyń Rıksdagynda Ortalyq Azııa parlamentterimen dostyq qaýymdastyǵy alǵash ret quryldy

5 ret kórsetildi

Shvesııanyń Rıksdagynda Ortalyq Azııa parlamentterimen dostyq qaýymdastyǵy alǵash ret quryldy, dep habarlaıdy Egemen.kz.

Shved saıasatkerleriniń bul mańyzdy qadamy osy eń iri Skandınavııa eli men keń baıtaq Ortalyq Azııa aımaǵy arasynda kóp qyrly qatynastardy nyǵaıtýǵa jaǵdaı jasaıtyn suhbat úshin keńistikti qurýǵa baǵyttalǵan. Parlamentarııler aldynda turǵan bul jáne basqa da mańyzdy mindetter týraly Qaýymdastyqtyń Tóraǵasy Hanna Vesterın Rıksdagtyń birqatar depýtattarynyń, sonyń ishinde Rıksdagtyń Birinshi vıse-spıkeri Osa Lındestamnyń qatysýymen onlaın rásiminde aıtty. Osy topqa keń spektrli máselelermen aınalysatyn ártúrli saıası partııa ókilderiniń kiretini nazar aýdartady.

Qaýymdastyqtyń alǵashqy quryltaı otyrysyna Qazaqstannyń Shvesııadaǵy Elshisi Qaırat Ábdirahmanov shaqyryldy. Ol otyrystyń qatysýshylaryn Ortalyq Azııada qalyptasqan dostyq pen kórshilik qatynastarmen, aımaqtyń úlken ekonomıkalyq áleýetimen, Qazaqstan men Shvesııa arasyndaǵy dástúrli tyǵyz yntymaqtastyqtyń jaǵdaıymen jáne bolashaǵymen, sondaı-aq Qazaqstan qoǵamyndaǵy reforma úderisterimen tanystyrdy.

Shvesııa parlamentarııleri aldaǵy Qazaqstandaǵy Parlament pen Qyrǵyzstandaǵy Prezıdent saılaýyna erekshe múddelilik tanytty. Qaýymdastyqtyń músheleri Ortalyq Azııadaǵy halyqaralyq qatynastar men geosaıasattyń basqa da ózekti máseleleri boıynsha pikir almasty.

Qaýymdastyq qurylýynyń ýaqytylyǵyna erekshe kóńil aýdaryldy, onyń qyzmeti parlamentter arasynda da, Shvesııa men Ortalyq Azııa halyqtary arasynda da tyǵyz jáne turaqty qatynastardy nyǵaıtý úshin tirek bolady. Taraptardyń ózara is-qımyly turaqty áleýmettik-ekonomıkalyq jáne demokratııalyq damýdyń ozyq tájirıbesimen almasýǵa, mádenı baıýǵa, ınvestısııalardy tartý men saýdanyń damýyna jaǵdaı jasaıtyn bolady.

Sońǵy jańalyqtar

Vıkıngterdiń izimen

Tarıh • Keshe

Uqsas jańalyqtar