«Klassıkter» arasyndaǵy saıysta 10 salmaq dárejesiniń júldeleri sarapqa salynady. Áńgimemizdi Olımpııa oıyndary baǵdarlamasyna engen salmaqtardan bastaǵanymyz jón. Sebebi kelesi jyly Tokıoda óner kórsetetin balýandardyń baby qalaı ekenin bilý bizder úshin de, basqalar úshin de óte mańyzdy. Barsha qazaqstandyq jankúıer de qazirgi kezde sol sańlaqtardyń ózara tartysyn taǵatsyzdana kútýde.
60 kılo salmaqtyń favorıtteri Meırambek Aınaǵulov pen Aıdos Sultanǵalı ekeni sózsiz. Ekeýi de dúnıejúzilik dodalarda daralanǵan dúldúlder. 26 jastaǵy Meırambek 2017 jáne 2019 jyldary júldegerler qataryna qosyldy. Parıjde ol kúmis alsa, Nur-Sultanda qolaǵa qol sozdy. Odan bólek, Aqtóbe oblysynyń ókili Azııa oıyndarynda úshinshi satyǵa taban tirese, Azııa birinshiliginde bir kúmis pen eki qolany qorjynǵa saldy. 24 jastaǵy Aıdos 2018 jyly Býdapeshtte uıymdastyrylǵan álem chempıonatynda qola medaldy moınyna ildi. Aıtýly qos sańlaqpen ıyq tiresýge tek Ernar Fıdahmetovtiń ǵana shama-sharqy jetedi degen oıdamyz. Kendi Altaıdyń saıypqyrany da talaı dúrmekterde ysylǵan ákki balýan.
Dáp qazir dýaly aýyz mamandardyń ózderi de 67 kılo salmaqtaǵy Almat Kebisbaev pen Meıirjan Shermahanbettiń qaısysy jeńetinin dóp basyp aıta almaı otyr. О́ıtkeni ekeýi de myqty. Jasy 33-ke taıap qalǵan Almattyń halyqaralyq arenada Qazaq eli namysyn qorǵap júrgenine 12 jyldan asty. Shyǵystyń shymyr jigiti sol aralyqta álem chempıonatynda tórt ret, Azııa oıyndarynda eki ret júlde aldy. Arasynda kúmisi men qolasy da bar. Tek altyn ǵana joq. Kebisbaev eki márte Azııa chempıony atanyp, taǵy eki ret kúmispen kúpteldi. London men Rıo Olımpıadalarynda baq synady. Keıingi jarysynda ol besinshi orynǵa taban tiredi. Al Meıirjan 2018 jylǵy álemdik dodada qola medaldy moınynda jarqyratty. Býdapeshttegi jarysta ol ataǵynan at úrketin nebir myqtylardyń aıaǵyn kókten keltirip, barsha kórermenniń ystyq yqylasyna bólendi. Sonymen qatar bul salmaqta Danııar Qalenov, Ádilhan Sataev jáne Nurbek Qyzyrov syndy julqynyp turǵan jigitter bar.
77 kılo salmaqtyń da myqtysyn dóp basyp aıtý qıyn. Iá, qazirgi kezde tizgin Ashat Dilmuhamedovtiń qolynda ekeni ras. Azııa chempıony jáne sol jarystyń úsh dúrkin júldegeri atanǵan Almaty oblysynyń ókili álemdik dodalarda jeńis tuǵyryna synyq súıem qalǵanda súrinip júr. Byltyr Nur-Sultandaǵy jarysta dańqy jer jarǵan Roman Vlasovtyń ózin súrindirgende rıza bolmaǵan jankúıer joq-aý, sirá! Biraq Ashattyń bul jolǵy básekelesteri de óte myqty. Olar – álem chempıonatynyń kúmis júldegeri Demeý Jadyraev, Azııa chempıondary Maksat Erejepov pen Temirlan Shadýkaev jáne Dúnıejúzilik Ýnıversıada men qurlyq birinshiliginiń júldegeri Ashat Jańbyrov. Bul jigitterdiń de «ólispeı berispeıtini» anyq.
Mamandardyń paıymdaýynsha, 87 kılo salmaqtyń bas júldesi úshin tartys Azamat Kustybaev pen Nursultan Tursynov arasynda ótýge tıis. Onyń syrtynda Baýyrjan Mýsın men Elmar Ýkalı bar. 97 kılo salmaq dárejesiniń úzdigi Erulan Ysqaqov. Oǵan Qurmanseıit Adaı laıyqty qarsylyq kórsetýi múmkin.
Asa aýyr salmaqtaǵy álem chempıonatynyń úsh dúrkin qola júldegeri, Azııa oıyndarynyń eki dúrkin jeńimpazy, Azııanyń eki dúrkin chempıony, Dúnıejúzilik Ýnıversıadanyń qola júldegeri Nurmahan Tynalıevti jyly ornynan yǵystyrý úshin Álimhan Syzdyqov pen Mansur Shadýkaevtyń esh aıanyp qalmaıtyny anyq.
Qalǵan tórt salmaq dárejesi Olımpııa oıyndarynyń baǵdarlamasyna enbegen. Desek te bul salmaqtarda da myqty balýandar az emes. Olımpıadaǵa barmasa da, olar álem jáne qurlyq chempıonattarynda kúsh synasady. Bul jarystardyń da mártesi zor. Aıtýly dodalarda el namysyn qorǵaýǵa laıyq ekenderin dáleldeý úshin Almaty tórinde óner kórsetetin saıypqyrandar da baryn salady. Bul rette biz Qorlan Jaqansha, Janserik Sársenbıev, Amanǵalı Bekbolatov (55 kılo), Ernur Fıdahmetov, Joldybaı Toqbaev, Baǵlan Jaqansha (63 kılo), Qaharman Qısmetov, Azat Sadyqov, Abragım Magamadov (72 kılo), Mıras Barshylyqov pen Evgenıı Polıvadov (82 kılo) syndy balýandardy erekshe atap óter edik.
