Үшінші орыннан үш команда үмітті

Футбол • 24 Қараша, 2020

Үшінші орыннан үш команда үмітті

26 рет көрсетілді

Футболдан премьер-лига командалары арасындағы Қазақстан чемпионатының 19-тур ойындары өтті. «Қайрат» мерзімінен бұрын жеңімпаз атанса, біріншілік аяқталар тұста үшінші орын үшін арпалыс күшейе түсті. Бұған себеп «Астана» мен «Ордабасының» күтпеген жерден жеңіліп қалуы және «Шахтердің» кезекті үш ұпайына қол жеткізуі болды.

Әли БИТӨРЕ

Келесі – 20-турдың ойындары бүгін өтеді. Онда «Астана» – «Қайсар», «Тараз» – «Каспий», «Шахтер» – «Жетісу», «Оқжетпес» – «Тобыл» және «Қызылжар» – «Ордабасы» командалары өзара кездеседі.

Турдың алғашқы ойыны «Астана» мен «Шахтер» арасында өтті. «Тобылмен» бірге күміс жүлдеге таласып жатқан елордалықтар күтпеген жерден «кеншілерден» 3:1 есебімен оңбай жеңіліп, күміс жүлде үшін күрестен шығып қалды. Ал маңызды жеңісіне қол жеткізген «Шахтер» футболшылары қола жүлде үшін күреске қосылды. Кездесудің 6-минутында қарағандылықтардан Руслан Мингазов есепті ашса, 24-минутта Сергей Зенёв таблодағы көрсеткішті еселей түсті. Екінші таймның соңында Еркін Тапалов «Шахтердің» үшінші голын салса, төреші қосқан қосымша минутта Дидар Жалмұқан «Астананың» жалғыз жауап голын соқты.

«Қайсармен» ойнаған «Ордабасы» да қолда тұрған үш ұпайынан айырылып қалды. Командалар бірінші таймда бір-бірінің қақпасына гол соға алмағанымен, екінші таймда «қасқырлар» Шымкент клубының қақпасына жауапсыз үш гол соқты. 51-минутта Иван Граф есеп ашса, 69 және 75-минуттарда команда капитаны Асхат Тағыберген дубльдің авторы атанды. Айта кетейік, «Қайсар» клубының бірнеше футболшысы клубпен келісімшартының аяқталуына байланысты командадан кетіп қалған болатын.

Бұл турда «Жетісудан» 1:0 есебімен басым түскен «Тараз» кезекті жеңісіне қол жеткізіп, турнир кестесіндегі жағдайын түзеп алды. Ал «Қайратты» 3:2 есебімен тізе бүктірген «Қызылжар» футболшылары турдың сенсациясын тіркеді. Матч барысында «Қайрат» футболшылары үстемдік танытқанымен, екі таймда да бір футболшыдан қызыл қағаз алып алаңнан қуылды. Сөйтіп кездесудің соңғы минутында гол өткізіп алды.

Турнир кестесінің соңында келе жатқан «Оқжетпес» пен «Каспий» өзара мықтыны анықтады. 2:1 есебімен жеңіске жеткен ақтаулықтар 14 ұпаймен 10-орынға көтеріліп алды. Ал көкшетаулықтар 11 ұпаймен көш соңында қалып қойды.

Сұрмергендер арасындағы бәсекеде Жоао Пауло («Ордабасы») 11 голмен бірінші орында тұр. Ал бразилиялықтың соңынан Абат Айымбетов («Қайрат») қуып келеді. Оның еншісінде 10 гол бар. Биылғы маусымда 8 гол соққан «Қайсардың» грузиялық шабуылшысы Элгуджа Лобжанидзе үздік үштікті түйіндеп тұр.

Күннің маңызды және өзекті жаңалықтарын «Егемен Қазақстан» телеграм каналынан оқыңыз