Amanatqa adaldyq

Rýhanııat • 24 Qarasha, 2020

Amanatqa adaldyq

25 ret kórsetildi

«Atamnyn Amanaty» qoǵamdyq birlestigi – Ekinshi dúnıejúzilik soǵys kezinde iz-túzsiz ketken qazaqstandyq sarbazdardyń jerlengen oryndaryn anyqtap, muraǵattyq-izdestirý jumystarymen júıeli aınalysatyn ári olardyń tarıhı qaharmandyq jolyn urpaq jadynda máńgi qaldyrý maqsatynda nátıjeli eńbek etip jatqan Qazaqstan aýmaǵyndaǵy birden-bir uıym. Alǵash ret 2019 jyldyń kúzinde Qorǵanys mınıstrliginiń atsalysýymen Qazaqstan Qarýly Kúshteriniń Ulttyq áskerı-patrıottyq ortalyǵynda Ekinshi dúnıejúzilik soǵysqa qatysqan elder elshileriniń qatysýymen «Atamnyn Amanaty» qoǵamdyq birlestiginiń tusaýkeseri ótken bolatyn.

Egemen Qazaqstan

Atalmysh uıymnyń maqsaty – Ekinshi dúnıejúzilik soǵys kezinde habarsyz ketkenderdiń deregin tabý ǵana emes, úzilip qalǵan urpaqaralyq sabaqtastyqty jalǵaý, tarıhymyzdy túgendeý. Qazirgi tańda bizdiń uıym zeınetkerler men ardagerlerden bólek, qatarymyzǵa jastardy da belsendi túrde tartý isine den qoıyp, urpaq sabaqtastyǵyn jalǵastyrý jolynda da belsendi jumys atqaryp keledi.

Elimizde tıisti deńgeıde nasıhattalmaı júrgen qazaqstandyq qaharmandar legi qanshama! Ekinshi dúnıejúzilik soǵysta batyr atanǵan 500-ge jýyq qazaqstandyqtyń, onyń ishinde 105 Alash batyrynyń sanaýlysy ǵana nasıhattalady. Batyrlardyń erlik shejiresinen búgingi urpaq beıhabar. Sol sebepti keshegi batyr atalarynyń erliginen jas býyn jan-jaqty habardar bolýy tıis.

Ekinshi dúnıejúzilik soǵysta 1,5 mıllıon qazaqstandyqtyń 270 myńy habar-osharsyz ketken. Arada 75 jyldan astam ýaqyt ótti. Sol kezdegi kýágerlerdiń kóbi búginde ómirde joq. Iаǵnı derekterdiń joıylǵanyna baılanysty iz-túzsiz ketkenderdi tabý tym qıyn. Men atalmysh uıym týrasynda bilmegenimde, jalpy bul múmkin dep te oılamappyn. Soǵan qaramastan «Atamnyn Amanaty» uıymy zor tabandylyq tanytyp, talaı sarbazdyń deregin tabý jolynda tynymsyz eńbek etip keledi.

Izdestirý jumystaryna beıjaı qaramaıtyn barlyq adamdar, Qazaqstan jáne ózge elderden de izdeýshiler men eriktiler shaqyrylyp, Ekinshi dúnıejúzilik soǵys kezinde habar-osharsyz ketkenderdi izdeýge ótinishterdi qabyldaý júzege asyrylady. Qazirgi esep boıynsha 3094 ótinish kelip tústi jáne bizdiń uıymnyń arqasynda 692 qazaqstandyq jaýyngerdiń jerlengen oryndary anyqtaldy, úsh otbasy músheleri Majarstan astanasy Býdapeshtke, sondaı-aq Reseıdiń Volgograd jáne Sankt-Peterbýrg qalalaryndaǵy baýyrlastar zıratyna baryp, taǵzym etip qaıtty. Osylaısha tabandy eńbeginiń arqasynda «Atamnyn Amanaty» qoǵamdyq birlestigi bıylǵy jyly Máskeý qalasynda Búkilreseılik «Ystyq júrek» syılyǵynyń laýreaty atandy.

Urpaqtar sabaqtastyǵy demekshi, biz jastarymyzdyń boıyna tól mádenıetimiz ben salt-dástúrimizdi, jalpy adamgershilik rýhanı dúnıetanymymyzdy darytý máselesin de aldymyzǵa maqsat retinde qoıyp otyrmyz. Sondyqtan da adamgershilik pen salt-dástúrdi bizdiń eldiń tiregi retinde túsinetin urpaq tárbıeleýdi maqsat tutýymyz qajet. Ol úshin biz ulttyq júıelerdiń barlyǵyna basa nazar aýdarýǵa tıispiz.

Rıza YSQAQ,

«Atamnyn Amanaty» qoǵamdyq birlestiginiń baspasóz hatshysy

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz