Tikeleı efırge Sybaılas jemqorlyqqa qarsy is-qımyl agenttigi oblys boıynsha departamentiniń basshysy Ardaq Erseıitov pen sala qyzmetkerleri qatysty. О́ńir basshysyna oblys turǵyndarynyń áleýmettik jelide jınaqtalǵan saýaldary qoıyldy.
– Quqyqtyq-statıstıkalyq málimetterge júginsek, bıylǵy 10 aıda sybaılas jemqorlyq sıpatynda 81 qylmys tirkelip, byltyrǵy jyldyń osy kezeńimen salystyrǵanda 26,4% tómendegeni baıqalady. Respýblıkadaǵy 17 óńirdiń arasynda tergeý óndirisinde bolǵan sybaılas jemqorlyq sıpatyndaǵy qylmystyq ister boıynsha bizdiń oblys 16-shy pozısııaǵa ornalasqan. Osy kórsetkishtiń ózi bul saladaǵy jumystardyń oń nátıjesi dep bilemin, – dedi Gúlshara Ábdiqalyqova.
Oblys ákimi azamattardyń aqparatqa qoljetimdiligin qamtamasyz etý maqsatynda memlekettik organdar tarapynan qabyldanyp jatqan is-sharalarǵa toqtalyp, ashyqtyq prınsıpi jemqorlyqty boldyrmaıtyn birden-bir jol ekendigin atap ótti.
Qazir oblystyq ákimdiktiń resmı ınternet-resýrsy arqyly kez kelgen azamat memlekettik organdar jumystary týraly aqparatty esh kedergisiz ala alady. Salalyq basqarmalardyń jumysy týraly málimet, konkýrstyq habarlandyrýlar, normatıvtik-quqyqtyq aktiler, óńir jańalyqtary kún saıyn jańartylyp turady.
Ashyqtyq prınsıpi qarjy salasyna da asa qajet. Osyǵan baılanysty ákimdikterdiń ashyq bıýdjetterine arnalǵan ınteraktıvti karta ázirlendi. Onda barlyq salalardyń shyǵysy týraly tolyq aqparat alýǵa múmkindik bar.
«Elektrondy úkimet», «Ashyq dıalog» egov.kz portalynda oblys ákiminiń qatysýymen turaqty túrde onlaın rejimde túrli taqyryptarda ınternet-konferensııalar ótkizilip turady. Bıyl 12 ınternet-konferensııa josparlanyp, sonyń segizi ótti. Túsken suraqtardyń barlyǵyna onlaın rejimde jaýap berildi.
Sonymen qatar arnaıy saıtta memleket tapsyrysy boıynsha salynyp jatqan qurylys nysandary týraly tolyq aqparat ornalastyryp, halyqqa qoljetimdi etý maqsatynda qurylys salasynda «Halyq monıtorıng» elektrondy júıesi iske qosylǵan.
Tikeleı efırde oblys ákimi kásipkerlik sýbektilerdiń zańdy múddeleriniń qorǵalýyn qamtamasyz etý boıynsha da saýaldarǵa jaýap berdi.
– О́ńirde bıznes aldyndaǵy ákimshilik kedergilerdi jáne sybaılas jemqorlyq kórinisterin joıyp, kásipkerdiń zańdy quqyǵy aıaqqa taptalmaýy úshin «Bıznesti jáne ınvestorlardy qorǵaý» jobasy iske asyrylýda. Onyń aıasynda jyl basynan beri oblystaǵy ınvestorlar men kásipkerlerdi demeý úshin 6 sheteldik jáne 15 otandyq jobamen kelisimshart jasaldy. Odan bólek pandemııa kezinde 51 myńnan astam kásipkerge salyqtyq jeńildikter berilip, 4 myńnan astam bıznesmen mindetti áleýmettik-medısınalyq saqtandyrý tóleminen bosatyldy, – dedi óńir basshysy.
Oblysta pandemııa kezinde 9 myń saýda alańy jalpy somasy shamamen 700 mln teńgege jýyq jaldyq tólemdi óteýden bosatylǵan. Eldegi bıznes ókilderine tıimdiligi eskerilip, aýyl kásipkerlerin jeńildikpen nesıelendirýge baǵyttalǵan «Qyzylorda» óńirlik ınvestısııalyq ortalyǵynyń qyzmeti 2025 jylǵa deıin uzartylyp otyr.
Sıfrly tehnologııa damyǵan saıyn jemqorlyqtyń da qadamy qysqara beretini daýsyz. Qujatyńdy qoltyqtap, ony tirketý úshin bireýdiń aldyna baryp jaǵdaı aıtýdy qoıǵan sátte jeń ushynan jalǵasýdyń da «dáýreni» bitedi. О́ńirde osy jyly sıfrly tehnologııaǵa baılanysty 7 baǵyt boıynsha 13 joba iske asýda. Onyń ishinde bilim berý salasynda «Qaýipsiz mektep» pen densaýlyq saqtaý baǵytyndaǵy «DICOM beınelerin jiberý jáne muraǵattaý úshin PACS júıesin engizý» jáne «Medısınalyq kýálandyrýdyń elektrondy júıesi» jobalary bar.
Tikeleı efırde aımaq basshysy memlekettik qyzmet kórsetý, epıdemııalyq ahýalǵa baılanysty bólingen bıýdjet qarajatynyń maqsatqa saı ıgerilýin baqylaý baǵytyndaǵy jumystarǵa da toqtalyp ótti.
QYZYLORDA
