Qazaqstan • 24 Qarasha, 2020

25 myńǵa jýyq qazaqstandyq ekologııany jaqsartý sharalaryn ázirleýge kómektesti

13 ret kórsetildi

Qazaqstannyń Ekologııa mınıstrliginiń basshysy Maǵzum Myrzaǵalıev seısenbi kúni Úkimet otyrysynda respýblıkanyń eko-belsendilerimen birlesip ázirlengen óńirlerdegi ekologııalyq ahýaldy jaqsartý jónindegi jol kartalaryn tanystyrdy.

Ekologııa mınıstrliginiń basshysy qorshaǵan ortany jaqsartý boıynsha mańyzdy sharalardy qarastyratyn Ekologııalyq kodekstiń jobasy Májilispen maquldanyp, Senattyń qaraýyna jiberilgenin eske saldy.

«Jańa ekologııalyq kodekstiń qabyldanýyn kútpeı, «Halyq únine qulaq asatyn memleket» tujyrymdamasyna súıene otyryp, ekologııalyq problemalar men olardy jurtshylyqpen, ásirese barlyq óńirlerdegi ekobelsendilermen sheshý joldary qaraldy. Barlyǵy on jeti onlaın kezdesý ótkizildi. Jıyrma bes myńǵa jýyq adam qatysty», - dedi Mınıstr.

Jurtshylyqpen, ákimdiktermen jáne tabıǵat paıdalanýshylarmen birlesken jumys nátıjesinde óńirlerdiń ekologııasyn jaqsartý jónindegi naqty sharalardy kózdeıtin on jeti jol kartasy ázirlendi.

Máselen, Qaraǵandy oblysynyń ekologııalyq jaǵdaıyn jaqsartý úshin daıyndalǵan Jol kartasynda elý jeti is-shara qarastyrylǵan. Olardyń arasynda «ArselorMıttal Temirtaý» kásipornynda qazandyq jáne gaz tazalaý jabdyǵyn qaıta jańartý, ák kúıdirý sehyn Temirtaý qalasynan tys shyǵarý jáne Jezqazǵan qalasynda «Qazaqmys» kásipornynyń jańa kúkirt qyshqyly sehyn salýdy aıtýǵa bolady. Bul sharalar qorshaǵan ortaǵa teris áserdi tómendetýge múmkindik beredi. Sondaı-aq, Temirtaý qalasynda óndiristik aǵyndy sýlardy tazartý torabyn jáne Balqash pen Jezqazǵanda jańa kárizdik tazartý keshenderin salý, «ArselorMıttal Temirtaý» qaldyqtaryn kádege jaratý, Jezqazǵanda bıoelektrostansııa salý jáne «Darıal-Ý» jerlerin qalpyna keltirý josparlanǵan.

Almaty qalasy boıynsha Jol kartasynda jıyrma is-shara qarastyrylǵan. Olardyń ishinde: JEO-2 jáne JEO-3 gazǵa aýystyrý, qalaǵa irgeles jatqan jeke sektor aýdandaryn gazdandyrý, kommýnaldyq qyzmetter men qoǵamdyq kóliktiń avtokóligin syǵylǵan tabıǵı gazǵa aýystyrý, dızel otynymen qoǵamdyq kólikke kezeń-kezeńimen tyıym salý, kógaldandyrý jáne t.b.

Aqtóbe oblysynyń jol kartasynda otyz úsh is-shara qarastyrylǵan.

О́ńirlik eko-belsendilermen barlyq talqylaýlar Ekologııa mınıstrligi basshysynyń qatysýymen ótti.

Sońǵy jańalyqtar

Elimizde taǵy 1050 adam indetten aıyqty

Koronavırýs • Búgin, 09:44

Semeıge Saqtaǵanov ákim boldy

Taǵaıyndaý • Keshe

Birneshe oblysta jol jabyldy

Qazaqstan • Keshe

Uqsas jańalyqtar