Qala ákimi Nurlybek Nálibaevtyń tóraǵalyǵymen ótken apparat májilisinde Aqsýat, Qosshyńyraý aýyldyq okrýgterinde jyl kóleminde atqarylǵan jumystar men aldaǵy mindetter qaraldy. Aqsýat aýyly jaıly habarlama jasaǵan okrýg ákimi Mámbetáli Aqmyrzaev 10 aı kóleminde kásipkerlik nysandar sanynyń artqanyn aıtyp ótti. Eldi mekende "Aýyl – el besigi" baǵdarlamasyna aıasynda da aýqymdy is atqarylǵan.
Bıyl Qosshyńyraý aýylynda aýyz sý máselesi tolyǵymen sheshilipti. Okrýg ákimi Dýlat Taýbaı eldi mekende jol jaǵdaıy da jolǵa qoıylǵanyn aıtty. Jyl basyndaǵy eseptik kezdesýlerde turǵyndar keshki mezgilde elektr qýatynyń álsirep qalatynyn aıtqan edi. Bul qala ákimdiginiń qoldaýymen óz sheshimin tapty.
Qos aýyldyń tynys-tirshiligin baǵamdap, jyl kólemindegi jetistikterin saralaǵan shahar basshysy qala irgesinde qanat jaıyp, kúre joldyń boıynan oryn tepken Aqsýatta memlekettik baǵdarlamalarǵa moıyn burǵan azamattardyń qatary áli de az ekenin aıtyp, kásipkerlik baǵytqa kelgende Qosshyńyraý da keıin qalyp turǵanyn atap ótti. Qala ákimi jyl aıaǵyna deıin qos aýyldyń da kórsetkishterin kóterýdi júktedi.
Sonymen qatar aýyldyq okrýgterdegi jol jóndeý, aýyl sharýashylyq salasyn sıfrlandyrý, tazalyq, qylmysty boldyrmaý maqsatynda jumystardy uıymdastyrý jaıly usynystaryn jetkizdi. Okrýgter aýmaǵynda jasalǵan qylmystardyń ashylýy boıynsha birqatar syn-eskertpe aıtqan qala ákimi qos basshyǵa da jumysty shıratýdy tapsyrdy.
