Oblysta jyl basynan beri 646 márte oqystan ot shyǵyp, jalyn sharpyp, sýmańdaǵan órt tili talaı dúnıeni jalmap ketti. Jalǵyz materıaldyq ıgilik qana emes, adam shyǵyny da bar. Aıtpaı kelgen apattan 3,5 myńnan astam adam materıaldyq shyǵynǵa dýshar boldy. Eń ókinishtisi, esepti kezeńde tótenshe oqıǵalardan 105 adamnyń qaıtys bolýy – orny tolmas qaıǵy-qasiret. Tótenshe jaǵdaılar departamentiniń bólimsheleri azamattardy apattan qutqarý úshin 1330 márte saparǵa shyqqan.
Oryn alǵan oqıǵalardy aqyl tarazysyna salyp eksheseńiz, eń aldymen qaýip-qateri mol qyraýly qysta jolaýshylardyń kúni buryn jasalǵan eskertýge qaramastan, jolǵa shyǵatyndyǵynda. О́tken qysta qar keptelisinde aıdalada qalǵan adam óte kóp boldy. О́zderi de beınet shekti, ózgeni de áýre etti. Negizinde osy oqıǵalardyń oryn alýyna kináli eskertýdi elemeıtin adamdardyń ózderi. Aýa raıynyń buzylyp kele jatqanyn kóre turyp táýekelge bel býyp, jolǵa shyǵady. Al tilsiz tabıǵatpen taıtalasý únemi jeńispen aıaqtala bermeıdi. Sondyqtan eskertýge qulaq asqan da abzal.
Ekinshi bir jaı – órttiń aldyn almaý. Jyl basynan beri órt qaýipsizdigi talaptaryn buzýdyń 2490 faktisi anyqtalyp otyr. Eger aldyn alý jumystary júrgizilmese, taǵy qanshama qaıǵy-qasiret oryn alar edi. Tekseris nátıjesi boıynsha 550-den astam adam ákimshilik jaýapkershilikke tartylǵan. Sóz arasynda azamattyq qorǵanys baǵyty boıynsha 129 adamǵa aıyppul salynyp, 429 adamǵa eskertý jasalǵan. Salynǵan aıyppuldyń 4 mln 709 myń teńgesi óndirilip alynǵan.
Qyzyl tili sýmańdaǵan órt óndiristik jáne turmystyq baǵyttaǵy nysandardy da sharpyp tur. Jyl basynan beri 631 márte órt oqıǵasynyń oryn alýy adamdardyń áli de talap pen tártipke moıynsuna qoımaǵanyn kórsetedi. О́rtten kelgen shyǵyn da qomaqty, 130 mln teńgeniń shamasynda. Eń bastysy, 22 adam tótennen kelgen oqıǵanyń kesirinen ómirimen qoshtasty, 9 adam jaraqat aldy. Mamandardyń saraptaýyna qaraǵanda, turǵyndar otty paıdalanǵanda qaýipsizdik sharalaryn saqtaı bermeıdi. Turmystyq elektr aspaptaryn paıdalanýda da órt qaýipsizdigi erejesi jıi buzylady. Sózimizge dálel retinde jyl basynan beri turǵyn úı sektorynda 448 márte órt oqıǵasy oryn alǵandyǵyn aıta ketýimiz kerek.
Qylyshyn súıretip qys kele jatyr. Qyraýly qysta qaterli oqıǵalar kóbeıýi de ábden múmkin. О́ıtkeni jekemenshik sektorda turǵyn úılerdi jylytý úshin pesh jaǵylady. Tótenshe jaǵdaılar departamenti beıqamdyq saldarynan turǵyndardy órtti paıdalaný kezinde 217 ret abaısyzdan órt shyǵaryp alǵan faktilerin tirkegen. Pesh pen murjany paıdalanýda órt qaýipsizdigi erejesi 73 márte buzylypty. Sondaı-aq elektr qondyrǵylardy montajdaý jáne tehnıkalyq paıdalaný erejesi de saqtala bermeıdi. Osy jyldyń qańtar jáne aqpan aılarynda 6 birdeı adam ómirden ótti. Onyń ishinde bes oqıǵada mastyqtyń saldarynan tóseginde temeki tartyp jatyp órt shyǵaryp alyp, orny tolmas oqıǵaǵa dýshar bolǵan. Turmystyq elektr aspaptaryn paıdalaný kezinde órt qaýipsizdigi erejesi buzylýynyń saldarynan úsh birdeı adam qaıtys bolǵan.
– Turǵyn úı sektoryndaǵy órtti azaıtý maqsatynda departament jylý berý jáne jazǵy órt qaýpi bar tusta úgit-nasıhat jumystaryn kúsheıtedi. Karantın sharalary kezinde qaýipsizdik erejelerin taratýǵa úı-úıdi aralap, túsinik jumystaryn júrgizýge múmkindik bolmady. Tek buqaralyq aqparat quraldary men áleýmettik jelilerde ǵana aldyn alý jumystaryn júrgizdik, – deıdi oblystyq tótenshe jaǵdaılar departamentiniń bastyǵy, azamattyq qorǵanys polkovnıgi Alekseı Sovetov.
Departament mamandary 264 myń adamǵa keńes bergen. Aldaǵy ýaqytta osyndaı keńesterge qulaq asyp, saqtyq sharalaryn saqtasa, qaýip-qaterge jol bermes edi.
Aqmola oblysy
