Qarjy mınıstrligi Memlekettik kirister komıteti tóraǵasynyń orynbasary Qaırat Jumaǵulov «Kommersııalyq emes uıymdarǵa salyq salý» taqyrybynda sóz sóıledi. Kezdesý barysynda kommersııalyq emes uıymdarǵa salyq salýdyń tártibi men talaptary turǵysynda aıtyldy.
«Kommersııalyq emes uıymdar qyzmetiniń erekshelikterin eskere otyryp, korporatıvtik tabys salyǵy salynbaıtyn birqatar kiris qarastyrylǵan. Mundaı bosatylǵan kiristerge kirý jáne múshelik jarnalar, aqysyz alynǵan kez kelgen múlik, sonyń ishinde granttar, demeýshilik nemese qaıyrymdylyq kómek túrinde, sondaı-aq birqatar basqa kirister kiredi.
Kommersııalyq emes uıymdardyń jekelegen sanattary áleýmettik salada jumys isteıtin uıymdarǵa berilgen jeńildik erejelerin qoldana alady. Eger áleýmettik saladaǵy qyzmetten alynǵan kirister jyldyq jıyntyq kiristiń keminde 90 paıyzyn qurasa, onda salyq tóleýshiler korporatıvti tabys salyǵyn eseptelgen mólsherde tolyǵymen kemite alady. Salyq salýdyń bul tártibi medısınalyq qyzmet, bilim berý, ǵylym, mádenıet jáne basqa da osyǵan uqsas áleýmettik baǵyttaǵy salalarǵa qoldanylady. Avtonomdy bilim berý uıymdary da keıbir erekshelikterimen korporatıvti tabys salyǵynan bosatyldy», dep atap ótti Q.Jumaǵulov.
Mınıstrliktiń aqparatyna qaraǵanda, byltyr KTS deklarasııalaryn 21 748 kommersııalyq emes uıym usynsa, olardyń jalpy kirisi 516,6 mlrd teńgeni qurady. Salyq salynatyn tabys 36,1 mlrd teńge mólsherinde aıqyndalyp, 9,1 mlrd teńge mólsherinde KTS tóleýden bosatylǵan.
Odan ári Áıelderge qatysty zorlyq-zombylyqty joıý kúresiniń halyqaralyq kúnine oraılastyrylǵan «Azamattyq qoǵam zorlyq-zombylyqqa qarsy» taqyrybynda dıalog ótti.
Is-sharaǵa Adam quqyqtary jónindegi ýákil E.Ázimova, Parlament Májilisiniń depýtaty I.Smırnova, Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń tóraǵasy L.Ramazanova, Aqparat jáne qoǵamdyq damý vıse-mınıstri A.Oralov, quqyq qorǵaýshylar, ÚEU basshylary, memlekettik organdardyń ókilderi, mektepterdiń belsendi oqýshylary qatysty.
«Otbasy – qoǵamnyń negizi. Búgingi kezdesý áıelder men balalarǵa qatysty zorlyq-zombylyq máselelerin sheshý boıynsha durys tásilderdi ázirleý úshin erekshe mańyzdy», dedi Qazaqstan Azamattyq alıansynyń prezıdenti B.Nurǵazıeva ashylý saltanatynda.
Is-sharanyń moderatory L.Ramazanova resmı statıstıkaǵa súıenip, bıyl 9 aıda qylmystyq quqyqbuzýshylyqtar sany 2019 jyldyń sáıkes kezeńimen salystyrǵanda 34,4%-ǵa azaıǵanyn, alaıda otbasylyq-turmystyq quqyqbuzýshylyqtar sany 2,5 esege óskenin atap ótti.
IIM Ákimshilik polısııa komıteti Iývenaldy polısııa jáne áıelderdi zorlyq-zombylyqtan qorǵaý basqarmasynyń bastyǵy A.Ospanov atap ótkendeı, «Eń kóp zorlyq-zombylyq mas kúıde jasalady, al agressorlardyń 80%-y jumyssyz. Zardap shekkenderdiń 45 paıyzy áıelder, 30 paıyzy kámeletke tolmaǵandar. Bıyl turmystyq quqyqbuzýshylyqtyń ósýi kóbine pandemııa jaǵdaıynda halyqtyń oqshaýlanýyna baılanysty boldy. Jyl basynan beri daǵdarys ortalyqtaryna 9 myńǵa jýyq jábirlenýshi áıel júgingen».
Dıalog alańynyń qorytyndysy boıynsha qatysýshylar turmystyq zorlyq-zombylyqtyń aldyn alýdy kúsheıtý, vedomstvoaralyq ózara is-qımyl tetikterin jetildirý jónindegi sharalardy iske asyrý týraly usynystar berdi.
