Sabaqtyń maqsaty – tyńdaýshylarǵa qazaq halqynyń ádet-ǵuryptary men salt-dástúrleriniń mańyzdylyǵyn jan-jaqty ashyp kórsetý, adamı qarym-qatynas róliniń ereksheligine mańyz berý, ádeptilikti dáripteý, bata, tilekti nasıhattaý. Sabaqqa elorda etnomádenı birlestikteriniń ókilderi jáne tildi meńgerýge nıet bildirgen eriktiler qatysty.
Memlekettik tildi meńgerýge basa mán bergen elorda etnomádenı birlestikteri ókilderine, eriktilerge bul joly oqytýshy Saǵym Estemisova ejelden kele jatqan qundylyqtarymyz týraly tolymdy málimetter aıtyp berdi.
Sabaq sátinde taqyrypty tereń ashý úshin arnaıy ınteraktıvti taqta men beınekórinis arqyly qundy derekter tyńdaýshylarǵa tanystyryldy. «Ult degenimiz – belgili bir aımaqta tarıhı qalyptasqan adamdar tobynyń áleýmettik-etnostyq birlestigi. Qazaq ulty sonaý ǵasyrlar tereńinen, rý-taıpalyq dárejeden bastap, XIV-XV ǵasyrlarda tutas halyqtyq dárejege jetkenshe talaı salt-dástúrlerdi basynan ótkizdi. "Dástúrdiń ozyǵy bar, dáýreni ótken tozyǵy bar" degendeı, bizge jetken tárbıelik máni zor búgingi ulttyq salt-dástúrler halqymyzdyń eń qymbat qazynasy», dedi S.Estemisova.
Bata berý, tilek jáne arnaý aıtý – ulttyq dástúrlerimizdi ulyqtaıtyn jahuttarymyz retinde sanalady. Osy qundylyqtarǵa jeke-dara toqtalǵan oqytýshy árbir sózdiń mańyzy bar ekenin jetkizdi. Sonymen birge júrekke jyly áser etetin qundylyqtardyń jas urpaqty otansúıgishtikke, tarıhı dúnıelerdi qadirleı bilýge, adamgershilikti ulyqtaı bilýge úndeıtinin aıtty. Oqytýshy tyńdaýshylarǵa tapsyrma berý arqyly sabaqtyń mańyzyn pysyqtap, olardyń ulttyq qundylyqtardy jetik bilýlerine erekshe mán berdi.
