COVID-19: Beıjiń tájirıbesinen qandaı sabaq alýǵa bolady?

Al qazir búkil álemde indet qaıta qarqyn alyp, ekinshi tolqynynyń qaýpi tónip turǵanda dúnıejúzilik qaýymdastyq Qytaıdyń tynys-tir­shi­ligine nazar aýdarary sózsiz. Osy oraıda biz Belorýs zertteý orta­lyǵynyń dırektory, Ekinshi Beı­jiń memlekettik shetel tilderi ýnıver­sı­tetiniń mádenı baılanys zertteý ınstıtýty dırektorynyń orynbasary Chjan Hýeısın hanymdy sózge tartqan edik. Ol óz elinde COVID-19 indetimen ekinshi tolqynyna qarsy qandaı is-sharalar júrip jatqanynan birshama habardar etti.

Chjan Hýeısın indettiń alǵashqy tolqyny týraly sóz qozǵaǵanda ózi turatyn Beıjiń qalasynyń mýnı­sı­paldyq basqarmasynyń joǵary deń­geıdegi qyzmetin erekshe atap óti. Qytaı astanasy tótenshe jaǵdaıdy bir aı kóleminde toqtatqan. Qaptaǵan qa­lyń eli bola tura indet juqtyrýdyń jańa saldarlary 6 shildede paıda bola bastaǵan. Al 20 shildede qater deńgeıi qaıtadan 2-den 3-deńgeıge deıin tómendedi. Sodan keıin baryp 20 mln turǵyny bar qalanyń turmys-tirshiligi bir qalypqa kelgen.

«Halyq dúrbeleńge boı aldyrmas úshin qala ákimshiligi aqparattyń ashyqtyǵyna basa mán berdi. Bılik BAQ-pen tyǵyz baılanysta boldy. 24 qańtar men 23 shilde aralyǵynda Beıjińde 160 baspasóz konferen­sııasy ótti. Turǵyndar astananyń hal-ahýalynan habardar. Sonymen qatar aqparattar áleýmettik jeliler arqyly tarady. Búginde bul bılik pen qoǵam arasyndaǵy qarym-qatynastaǵy basty aqparat kópiri tárizdes. Baspasóz konferensııalarynda naýqastardyń aýrý juqtyryp alý úderisi, turǵyndardy qaýipten saqtandyrý úshin indettiń aldyn alý baǵytynda qabyldanǵan is-sharalar men onyń jaı-japsary egjeı-tegjeıli baıandalyp otyrdy. Al aýrýdyń ekinshi ret paıda bolý kezeńinde Beıjińde shekteýler qaı­ta­dan kúsheıdi: metro, turǵyn úı ke­shen­deriniń kireberisinde dene qy­zýy tekserildi, bastaýysh jáne orta mek­tep oqýshylarynyń oqýlary toq­­ta­tyldy, keıbir qoǵamdyq oryndar ja­­byldy. Alaıda astana halqy esh­qandaı dúrbeleńge salynbady. Olar úkimettiń usynystaryna qulaq túrdi: tyǵyz baılanys jasaý kezinde kem degende araqashyqtyq bir metr jáne adamdar shoǵyrlanǵan jerlerde bári qaıtadan betperde taqty, tipti úıden jıi shyqpaýǵa tyrysty. Adamdar toptasyp, jaqyn tanystar, dostar birge tústenýdi doǵardy, saýyq keshterdi toqtatty», deıdi Chjan Hýeısın.

Onyń aıtýynsha, indetti iri qalada tejeý úshin Beıjiń tájirbıesi úlgi bola alady. Birinshiden, Beıjińde aýrýdyń ekinshi ret taralýyna mýnısıpaldyq basqarmanyń qanshalyqty daıyn ekenin aıqyndady. Bılik árdaıym indettiń jańadan taralýyna eń joǵary deńgeıdegi daıyndyq satysynda boldy, eshbir jaǵdaıda bosańsymady.

Ekinshiden, indetti tejeýde qabyl­dan­ǵan aldyn alý sharalary men tetik­ter ǵylymı zertteýler nátıjesine ne­gizdeldi. Aýrýdyń qaıtalanǵany tý­raly aqparat paıda bolysymen, kópshilik TJ deńgeıi qalanyń barlyq aýmaǵynda ornaıdy degen oıda boldy. Alaıda bılik bul joly asyqpady ári basqa joldardy qarastyrdy. Shuǵyl epıdemııalyq tekseris 22 saǵat ishinde naqty juqtyrý oryndardy anyqtaý múmkindigin týǵyzdy. Ásirese kópte­gen málimet kómegimen juqtyrý yq­tımaldy jaǵdaılar anyqtaldy. Ná­tıjesinde, tıisti áreket etý sharalary qańtar aıyndaǵy jaǵdaı tárizdi jappaı qala boıynsha emes, tek juqtyrý jaǵdaılary anyqtalǵan aýdandarǵa ǵana qoldanyldy.

Úshinshiden, keń aýqymdy testileý júrgizildi. 3 shildege deıin on mln-nan asa turǵyn nýkleın qyshqyldary ­amplıfıkasııa testisinen aqysyz te­gin ótti. Bul juqtyrǵan naýqastar­dy jyldam anyqtaýmen qatar, tóten­she jaǵdaıda dúrbeleńge salynbaýyna kóptep kómegin tıgizdi.

Tórtinshiden, jedel telefon je­li­si mekeme basshylary men qala tur­ǵyndaryn jaqyndatty. Adamdar in­detke baılanysty kez kelgen máse­leleri men qıyndyqtary, qandaı da bir turmystyq jaǵdaılar boıynsha da qońyraý shaldy. Tek qana 15-21 maýsym aralyǵynda 70 400 qońyraý, al 22-28 maýsym aralyǵynda qońyraý sany 101 161 esege ósti. Barlyq suraq­qa jaýap berildi, bul astana ómiriniń turaqtalýyn qamtamasyz etti.

Indetti tejeýde qabyldanǵan al­dyn alý sharalary men tetikter Beı­jińde óz nátıjesin berdi. Dál qazir qala ómiri arnasyna tústi. Úkimet eko­no­mıkany qalypqa keltirý úshin ma­ńyzdy is-sharalar qabyldady. Bul qala in­dettiń jańadan taralýyn jeńdi, ári COVID-19 kúresýde salmaqty tájirıbe jınaqtady.

ALMATY