Qurmetti dostar!
Barshańyzdy Qazaqstan Respýblıkasynyń Tuńǵysh Prezıdenti kúnimen quttyqtaımyn!
Bul merekeniń eldigimiz ben egemendigimiz úshin mańyzy zor. Sebebi, 1 jeltoqsan ult shejiresine halqymyz kemel keleshek jolynda tarıhı tańdaý jasaǵan kún retinde jazyldy. Shyn máninde, táýelsiz Qazaqstannyń búgingi jetistikteri men jeńisteri Elbasymyzdyń eren eńbeginiń nátıjesi ekeni sózsiz.
Tuńǵysh Prezıdentimiz saılanǵan kúndi jalpyulttyq meıramǵa aınaldyryp, keń kólemde atap ótýdi halyqtyń Elbasyna degen erekshe qurmeti dep qabyldaýymyz kerek. Elbasyna kórsetilgen qurmet – táýelsizdikke jasalǵan taǵzym. Keshe ótken halyqaralyq konferensııada da Nursultan Ábishuly Nazarbaevtyń memleket qalyptastyrý jolyndaǵy erik-jigeri men qajyr-qaıraty týraly sóz qozǵap, tarıhı sheshimderine toqtalǵan edik.
Eldiń mereıin ósiretin mereke qutty bolsyn! Ár shańyraqqa shattyq pen baq-bereke tileımin! Táýelsiz Qazaq eli jasaı bersin!
