Boksshylar pandemııa jaǵdaıynda 9 aıǵa jýyq sharshy alańda boı kórsetpegennen keıin be, áıteýir barlyq boksshy rıngke ash qasqyrdaı shyǵyp, aldyndaǵy qarsylasyn aıaǵan joq. Olar chempıonattyń birinshi kúninen bastap, sońǵy kúnine deıin jankúıerlerge tartysty jekpe-jek syılady.
Jalpy, bıylǵy chempıonat sensasııa men tosyn oqıǵalarǵa toly boldy. Irikteý kezeńindegi sensasııalardy aıtpaǵannyń ózinde, fınaldyq saıysta 100 paıyz jeńiske jetedi degen boksshylardyń ózi qarsylasynan aılasyn asyra almady. Sonyń biri eń jeńil salmaqta boldy. Bes ret el birinshiliginde top jarǵan 32 jastaǵy tájirıbeli boksshy Temirtas Júsipov fınalda esimi jankúıerlerge tanys emes 19 jastaǵy Danııal Sábıtpen judyryqtasty. Qarsylasynyń jasynan, tájirıbesinen qaımyqpaǵan Danııal úsh raýnd boıy belsendi qımyldap, nátıjesinde tóreshilerdiń biraýyz sheshimimen jeńiske jetti.
Sondaı-aq fınalda jankúıerlerdiń aıyzyn qandyratyn naǵyz jekpe-jekti 52 kıloda fınalǵa shyqqan boksshylar kórsetti. Tokıo Olımpıadasynyń joldamasyn ıelengen Sáken Bıbosynov fınalda jastar arasynda úsh márte Azııa chempıony atanyp, eresekter dýyna bıyl ǵana qosylǵan Sabyrhan Mahmudqa ese jiberdi. Jan alysyp, jan berisken kezdesýde eki boksshy da aıanyp qalǵan joq. Biraq tóreshilerdiń sheshimi boıynsha Sabyrhannyń mereıi ústem boldy. Osy jetistiginiń arqasynda ol boks mamandaryna áli talaı bıikterdi baǵyndyratynyn dáleldedi. Bul kezdesýdiń tartysty ótýiniń negizgi sebebi, naýryz aıynda Iordanııada ótken Olımpııa oıyndaryna joldama beretin týrnırge kimdi apararyn bilmeı, bapkerlerdiń pikiri ekige bólingende sońǵy sheshim Mahmudqa emes, Bıbosynovqa túsken eken. Sodan Sabyrhan osy birinshilikte Sákendi qalaıda jeńip, birinshi nómir atanamyn dep óz-ózine sert bergen. Tipti jekpe-jek sońynda bergen suhbatynda Sabyrhan Sákendi óziniń basty qarsylasy sanaıtynyn jasyrǵan joq.
57 kg salmaqta qurama úzdigi, Tokıo Olımpıadasyna joldama alǵan Serik Temirjanov óziniń rasynda úzdik ekenin taǵy bir dáleldedi. Pavlodarlyq boksshy fınalǵa deıin barlyq qarsylasyn bir demmen utyp, fınalda Aqmola oblysynyń ókili Oraz Asylqulovty esh qıyndyqsyz jeńdi.
60 kg salmaqta osydan eki jyl burynǵy el chempıonatynda ekinshi oryn alǵan mańǵystaýlyq Samatáli Tóltaev fınalda shyǵysqazaqstandyq Beknur Ojanovty jeńip, eresekter arasyndaǵy alǵashqy chempıondyǵyna qol jetkizdi. Tóltaev fınalǵa joldama berer básekede qaraǵandylyq Vasılıı Samchýkty jeńse, Beknur Ojanov London Olımpıadasynyń qatysýshysy elordalyq Ilııas Súleımenovten basym túsken-di.
63 kıloda fınaldyq jekpe-jek ótken joq. О́ıtkeni Aqmola oblysynan kelgen Bolat Ersultan jaraqatyna baılanysty rıngke shyǵýdan bas tartty. Sóıtip Almaty oblysynyń ókili Ertýǵan Zeınýllınov báıgeni shappaı aldy. Tokıo Olımpıadasynyń joldamasyn ıelengen Zákir Safıýllın jaraqatyna baılanysty jartylaı fınalǵa shyqpaǵan soń qola júldeni qanaǵat tutty.
69 kıloda fınalda qaraǵandylyq Abylaıhan Júsipov pen jambyldyq Aslanbek Shymbergenovtiń joly taǵy da túıisti. 2018 jyly Aqtaýda ótken chempıonatta eki boksshy kezdesip, Júsipovtiń mereıi ústem bolǵan edi. Tipti sol aıqasta Shymbergenov abaısyzda nokdaýnǵa da túsip qalǵan-dy. Osy joly ese qaıtarýdy kózdegen Aslanbek báribir dittegen maqsatyna jete almady. Ekinshi raýndta Júsipovtiń oqys áreketinen jambyldyq boksshy jaraqat alyp, qabaǵy qanaı bergen soń tóreshiler jekpe-jekti toqtatty. Jeńis Abylaıhannyń enshisine jazyldy.
75 jáne 81 kılo salmaqtarda úzdikter bapkerler men jankúıerler senimin aqtady. 2018 jyly jaraqatyna baılanysty el chempıonatyna qatysa almaǵan Ábilhan Amanqul (75 kg) bıyl barlyq qarsylasyn esh qıyndyqsyz jeńip, fınalda atyraýlyq Nurqanat Raıystan basym tústi. Al 81 kılodaǵy taǵy bir quramanyń úzdigi Bekzat Nurdáýletov jastar arasyndaǵy álem chempıonatynyń júldegeri Nurbek Oralbaıdan myqty ekenin dáleldedi.
91 kıloda 2018 jylǵy chempıon Vasılıı Levıt jaraqatyna baılanysty bıylǵy jarysqa qatysa almaı, biraz jasqa úmit syılady. Bul salmaqtyń fınalynda bir qalada, bir bapkerdiń qol astynda jattyǵatyn eki boksshy – Aıbek Oralbaı men Saǵyndyq Toǵambaı baq synady. Biri – jasóspirimder arasynda Olımpıada chempıony bolsa, ekinshisi – jastar arasyndaǵy álem chempıonatynyń kúmis júldegeri jáne Azııanyń eki dúrkin chempıony. Teń jaǵdaıda ótken jekpe-jekte tóreshiler Aıbektiń qolyn kóterdi.
Asa aýyr salmaqtaǵy ishki birinshiliktiń fınaly sońǵy jyldary Qamshybek Qońqabaev pen Nurlan Saparbaıdyń arasynda ótip keledi. Degenmen, Saparbaı eki jyldan beri Qońqabaevtyń osal tusyn taba almaýda. Sóıtip eki boksshy arasyndaǵy bıylǵy aıqas ta Qamshybektiń jeńisimen aıaqtaldy.
Osylaısha dástúrge aınalǵan el chempıonatynyń bıylǵy básekesinde jalpykomandalyq esepte 2 altyn, 2 qola alǵan Mańǵystaý oblysy kósh bastady. Ekinshi orynǵa 1 altyn, 2 kúmis, 1 qola ıelengen Nur-Sultan boksshylary ornalasty. Úshinshi satyǵa 1 altyn, 1 kúmis, 3 qola enshilegen Jambyl oblysynyń komandasy turaqtady.
Endi jeńimpaz ben júldegerler qatarynan kóringen boksshylar ulttyq quramaǵa alynyp, jeltoqsan aıynda Almatydaǵy «Aq Bulaq» olımpıadalyq bazasynda alǵashqy oqý-jattyǵý jıyndaryn ótkizedi. Jańa jyldan bastap halyqaralyq jarystarǵa qatysyp, sheteldiktermen birlesken oqý-jattyǵý jıyndaryna qatyspaq.
