"Biz búgin asa mańyzdy salany qarap, talqylaý úshin jınalyp otyrmyz. Shaǵyn jáne orta kásipkerlikti damytý – el ekonomıkasynyń ósimin jáne onyń turaqtylyǵyn qamtamasyz etýdiń negizgi sharttarynyń biri. Qazirgi ýaqytta bul máseleniń mańyzy burynǵydan da arta tústi. Pandemııa birqatar salaǵa, onyń ishinde shaǵyn jáne orta bızneske de óz zardabyn tıgizdi. Kólik, saýda, qyzmet kórsetý, qoǵamdyq tamaqtaný, qonaq úı jáne jyljymaıtyn múlik bıznesi aıtarlyqtaı shyǵynǵa ushyrady", dedi Senat spıkeri.
Máýlen Áshimbaev pandemııadan kem degende 800 myń otandyq kásipker zardap shekkenin basa aıtty.
"Qazirgi tańda shaǵyn jáne orta kásiporyndar shamamen 3 mıllıon 300 myń qazaqstandyqty jumyspen qamtyp otyr. Bul ekonomıkalyq belsendi halyqtyń 39 paıyzyn quraıdy. Sondyqtan osy salanyń áleýmettik mańyzy óte zor. Shaǵyn jáne orta bıznes Memleket basshysynyń basty nazarynda", deıdi Senat Tóraǵasy.
Prezıdentimiz bıylǵy Joldaýynda shaǵyn jáne orta bızneske qosymsha kómek retinde keshendi qoldaý sharalaryn usynǵanyn jáne pandemııaǵa baılanysty jeńildikpen beriletin nesıe kólemi aıtarlyqtaı ulǵaıǵanyn qosa ketti.
"Nesıelerdi 6 paıyzǵa deıin tómendetý úshin memlekettik sýbsıdııa berilýde. Memlekettik organdar men kvazımemlekettik sektorǵa tıesili jyljymaıtyn múlik nysandaryn jalǵa alǵany úshin tólenetin jaldaý aqysy jyl sońyna deıin toqtatyldy. Shaǵyn jáne orta bıznes ókilderiniń eńbekaqy qoryna túsetin aýyrtpalyq jeńildetildi. Salyq kodesine birqatar mańyzdy túzetýler eńgizilýde. Shaǵyn jáne orta bıznesti eki jylǵa qosylǵan qun salyǵynan jáne áleýmettik salyqtan bosatý usynyldy", deıdi Máýlen Áshimbaev.
Sondaı-aq Senat spıkeri Prezıdent tapsyrmasy boıynsha tabystyń 3 paıyzy kóleminde bólshek salyq engiziletinin alǵa tartady.
"Osy jáne basqa sharalar shaǵyn jáne orta kásipkerlikti damytýǵa óz úlesin qosatyny sózsiz. Jalpy, osy salaǵa qatysty júıeli jumystardy ári qaraı da jalǵastyrýdyń mańyzy zor. Memleket basshysy óz Joldaýynda shaǵyn jáne orta bıznestiń qyzmetin retteıtin jańa normatıvtik-quqyqtyq baza ázirleýdi tapsyrdy. Osyǵan oraı birqatar qalyptasqan úrdiske nazar aýdarýymyz kerek", deıdi Senat Tóraǵasy Máýlen Áshimbaev.
