Aımaqtar • 04 Jeltoqsan, 2020

Aýyl sharýashylyǵynyń úzdikterine "MTZ-82.1" traktory berildi

256 ret kórsetildi

Búgin oblys ákimi Amandyq Batalov óńirdegi agroónerkásip kesheni eńbekkerlerin quttyqtap, birqatar marapatty tapsyrdy. Shara onlaın rejimde ótip, aýdan, qalalardyń ókilderi jıynǵa beınebaılanys arqyly qatysty, dep habarlaıdy Egemen.kz Almaty oblysy ákiminiń baspasóz qyzmetine silteme jasap.

Oblys basshysy óńir halqynyń 80%-y aýyldyq jerlerde turatyndyqtan agrarlyq salanyń damýy halyqtyń ál-aýqatymen tyǵyz baılanysty ekenin tilge tıek etti. Oblystyń basymdyq beretin daqyldaryn ósirý, óńdeý isin damytý, ınvestısııa tartý sııaqty kóptegen osy saladaǵy negizgi baǵyttardyń aıaq alysyna, aýyl sharýashylyǵy salasyndaǵy jańalyqtar men jetistikterge qysqasha toqtaldy.

1

"2020 jyl koronavırýs indetine baılanysty ońaı bolǵan joq. Memleket basshysy Qasym-Jomart Kemelulynyń tapsyrmasyna sáıkes Úkimet der kezinde qoldaý sharalaryn qabyldady. Sonyń arqasynda kóktemgi egis jumystary ýaqytyly júrgizildi. Oblysqa kóktemgi egis jumystaryna "Agrarlyq nesıe korporasııa" arqyly berilgen 1,1 mlrd teńge jeńildetilgen nesıe kóp kómek boldy. Egis alqabynyń kólemi 7 myń gektarǵa artyp,  968 myń gektarǵa jetti. Aýa raıynyń qolaısyz bolǵanyna qaramastan oblys eńbekkerleriniń tynymsyz eńbeginiń arqasynda 1,4 mln tonna dándi daqyldar jınaldy. Júgeriniń shyǵymy  gektaryna 67,2 sentnerden bolyp, 581 myń tonna ónim jınaldy. Qant qyzylshasy bıylǵy jyly orta eseppen gektarynan 380 sentnerden alyndy.Jekelegen sharýashylyqtarda bul kórsetkish 600-800 sentnerge jetti, 550 myń tonn ónim jınaldy, bul ótken jylmen salystyrǵanda 25 myń tonnaǵa artyq. Bıyl 50 myń tonna aq qant alý josparlanǵan. Osy rette óńirdegi qyzylsha ósirýshilerdi qoldaý maqsatynda 2021 jyldan bastap óńdeýge ótkizilgen ónimniń ár tonnasyna beriletin sýsıdııa kólemin 10 myń teńgeden 12 myń teńgege ósiremiz", dep atap ótti A. Batalov.

Sondaı-aq oblys ákimi óz sózinde mal sharýashylyǵyn órkendetý, ırrıgasııalyq júıelerdi qalpyna keltirý, salaǵa strategııalyq ınvestorlar tartý máselesine de toqtaldy. Máselen, amerıkalyq "Taıson fýds" kompanııasynyń iri qara etin óńdeıtin zaýyty, germanııalyq ınvestor "Baýman" kompanııasynyń usaq mal etin tereńnen óńdeıtin jobasy qolǵa alyna bastady. 7 jyl toqtap turǵan, qýaty  29 myń tonna  bolatyn "Otan Grın Fýd" qus fabrıkasy qaıta jańǵyrtylýda.

"Aýyl sharýashylyǵyna tartylǵan ınvestısııa kólemi 50,9 mlrd. teńgege jetti, jyl basynan 25 ınvestısııalyq joba iske qosyldy. Jalpy qabyldanǵan sharalar nətıjesinde jyl sońyna qaraı aýyl sharýashylyǵy óniminiń jalpy kólemi 900 mlrd. teńgege jetedi. Biz bul tabystarmen toqtap qalmaımyz. Kelesi jyly bul kórsetkishti 1 trln. teńgege jetkizemiz dep josparlap otyrmyz. Bizdiń búgingi maqsatymyz – Prezıdentimizdiń Agroónerkásip keshenindegi eńbek ónimdiligin jəne aýyl sharýashylyǵy ónimderiniń eksportyn 2,5 ese arttyrý týraly tapsyrmasyn oryndaý. Ol úshin bizde barlyq jaǵdaılar bar, sonyń ishinde eń bastysy eńbekqor əri jaýapkershiligi mol adamdar – bizdiń basty baılyǵymyz. Sizder, agrarlyq salanyń mamandary, ózderińizdiń kúndelikti tynymsyz eńbekterińizdiń arqasynda azyq-túlik qaýipsizdigin qamtamasyz etip, halyqtyń əl-aýqatyn arttyrýǵa, jalpy eldiń damýyna zor úles qosyp kelesizder. Qajyrly eńbekterińiz úshin Sizderge alǵys aıtamyn", dep sózin qorytyndylady A. Batalov.

1

Osy jıynda oblys ákimi birqatar azamattarǵa marapat tapsyrdy. Atap aıtqanda, Aýyl sharýashylyǵy mınıstrliginiń "Eńbek ardageri" medalimen Aqsý aýdanyndaǵy "Marlen-A" JShS-niń jetekshisi Museke Ámirov, Eskeldi aýdanynan "Romanenko V.V" ShQ-nyń basshysy Vıktor Romanenko, sarqandyq "Samal" ShQ basshysy Ermek Qalıev marapattaldy. Sol sııaqty ótken jyldyń qorytyndysy boıynsha aýyl sharýashylyǵy salasynda Balqash aýdanyndaǵy "Agrofırma Birlik" JShS úzdik dep tanylyp, onyń dırektory Almas Qystaýbaevqa I dárejeli dıplom men "MTZ-82.1" traktorynyń kilti berildi. Dál osyndaı syılyq sharýa qojalyqtary arasynda úzdik atanǵan Jambyl aýdanynyń "Shaltabaeva J.E" sharýa qojalyǵyna tapsyryldy. Marapatty qojalyq ókili Talant Seńgirbaev aldy. Jıynda sóz alǵan "Agrofırma Birlik" JShS dırektory Almas Qystaýbaev seriktestiktiń jumysy týraly azdy-kem aıtyp ótti. Onyń aıtýynsha, ujymnyń eseli eńbeginiń jáne memlekettiń jandy qoldaýynyń arqasynda bıyl 4600 tonna kúrish, 7200 tonna astyq jınalǵan. 250 adam eńbek etetin seriktestik iri jáne usaq mal sanyn qazir 10 myńǵa jetkizgen. Maldyń jem-shóbi der kezinde daıyndalǵan, qıyndyq joq. О́nimderin eksportqa shyǵarýǵa nıetti. Qaıyrymdylyqpen de aınalysyp, kóp balaly otbasylaryna azyq-túlik jaǵynan kómektesip turady. A. Qystaýbaev erkin eńbek etýge múmkindik jasap, barynsha qoldaý kórsetken el basshylyǵyna rızashylyǵyn bildirip, áriptesterin kásibı merekelerimen quttyqtady.  

Sonymen qatar "Shaltabaeva J.E" sharýa qojalyǵynyń ókili Talant Seńgirbaev ta pikir bildirip, quttyqtaý sóz sóıledi.

Ary qaraı aýyl sharýashylyǵy qyzmetkerleriniń kúnine oraı marapattaý rásimderin jergilikti jerlerde aýdan, qala ákimderi jalǵastyrdy.

Sońǵy jańalyqtar

Jańa basylym – jaqsylyqtyń jarshysy

Rýhanııat • Búgin, 18:34

Koronavırýs gúl arqyly juǵa ma?

Koronavırýs • Búgin, 17:08

Almatyda páter urylary ustaldy

Aımaqtar • Búgin, 16:37

Oralda 17 jastaǵy jigit kópirden sekirdi

Aımaqtar • Búgin, 15:18

«Nissan Primera» kóligi jylqy soqty

Aımaqtar • Búgin, 13:25

Uqsas jańalyqtar