Germanııa Federatıvtik Respýblıkasynyń Prezıdenti Frank-Valter Shtaınmaıer jeke óziniń jáne búkil eliniń atynan Qazaqstan halqyn Táýelsizdik kúnimen shyn júrekten quttyqtady.
«Táýelsizdik alǵan sátten bastap eki eldi dostyq ári tyǵyz qatynastar biriktiredi. Qazaqstandaǵy etnıkalyq nemister óz mádenıetine degen qurmetke ıe bola otyryp, elderimiz arasyn baılanystyrýshy altyn kópir bolyp otyr. Sizdiń Berlınge jasaǵan byltyrǵy saparyńyz bizdiń yntymaqtastyǵymyzǵa qosymsha serpin berdi. Germanııa bolashaqta Qazaqstannyń senimdi seriktesi bolyp qala beredi», delingen GFR Prezıdentiniń jedelhatynda.
Rım Papasy Fransısk quttyqtaý hatynda Qazaqstan Prezıdentin Táýelsizdik kúnimen quttyqtap, barlyq eldiń beıbitshilik pen yntymaqtastyqta bolýyna jáne qudaıdyń rızashylyǵyna bólene berýine tilektestik bildirgen júrekjardy sózderin jetkizgen.
Qazaqstannyń Táýelsizdik alǵanyna 29 jyl tolýyna oraı Qasym-Jomart Toqaevqa Qyrǵyz Respýblıkasy Prezıdentiniń mindetin atqarýshy Talant Mamytov ta quttyqtaý hatyn joldady.
«Qazaqstan Respýblıkasy táýelsizdik jyldary memleketti qalyptastyrý, saıası jáne áleýmettik-ekonomıkalyq damý isinde úlken tabysqa qol jetkizdi, halyqaralyq arenadaǵy elińizdiń bedeli birtindep nyǵaıyp keledi. Qyrǵyz Respýblıkasy men Qazaqstan Respýblıkasy arasyndaǵy tatý kórshilikke, strategııalyq seriktestikke jáne odaqtastyq baılanystarǵa negizdelgen ekijaqty qatynastar eki eldiń ıgiligi úshin odan ári damyp, tereńdeı beretinine senimdimin», delingen jedelhatta.
Aýstrııanyń Federaldyq Prezıdenti Aleksandr Van der Bellen óziniń quttyqtaýynda barlyq qazaqstandyqtarǵa baq-bereke tilegen.
«Elderimiz arasynda qalyptasqan jaqsy dostyq qarym-qatynastar ekonomıka jáne energetıka salalaryndaǵy yntymaqtastyqtyń odan ári damyp, keńeıýine septigin tıgizedi dep senemin», dep jazǵan Aýstrııa Prezıdenti.
Sonymen qatar Qasym-Jomart Toqaevtyń atyna quttyqtaý jedelhattaryn Nıderland Koroli Vıllem-Aleksandr, Kanadanyń General-gýbernatory Jıýlı Paıett, Malaızııanyń Premer-Mınıstri Tan Srı Mýhıddın Iаsın, Taıland Koroldiginiń Premer-Mınıstri Praıýt Chan-Ocha, Aýstralııa General-gýbernatory Devıd Herlı, Nıkaragýa Prezıdenti Danıel Ortega Saavedra jáne Nıkaragýanyń Premer-Mınıstri Rosarıo Mýrılo joldady.
