Qala ákimdigi usynǵan aqparat boıynsha, nysan qurylysyna jalpy kólemi 1,5 mlrd teńge ınvestısııa salynsa, sonyń 700 mıllıony «Bıznestiń jol kartasy» arqyly bólingen. Nátıjesinde 435 jumys orny qurylypty. Saýda ortalyǵynda otandyq jáne sheteldik óndirýshilerdiń nan-toqash ónimderi, bakaleıa ónimderi, jemister, kókónister, et, balyq jáne ózge de taýarlardyń keń assortımenti usynylmaq.
– Munda jergilikti óndiris taýarlaryn: fermerlik jáne aýyl sharýashylyǵy, kókónister, jemister jáne basqa da ónimderdi satýmen aınalysamyz. Sonymen qatar Eýropada óndirilgen taýarlar da bizdiń sóremizden tabylady. Arnaıy zerthana taýarlardy GMO-ǵa tekserýmen aınalysady jáne sertıfıkattarǵa qaraıdy, – deıdi «Kerýen» saýda-óndiristik ortalyǵynyń basshysy Erlan Sultanov.
Ortalyqtyń basqarýshy dırektory Berik Abylqanovtyń aıtýynsha, ortalyqta jalǵa alýshylardyń kópshiligi óz ónimderin qolaıly baǵamen usyna alady.
– Búgingi tańda bizde barlyq jalǵa berý oryndary bos emes. Osy aptada saýda-óndiristik ortalyǵymyzdy tolyǵymen iske qosýdy josparlap otyrmyz. Munda yńǵaıly saýda úshin barlyq jaǵdaı jasalǵan. Sondaı-aq sórelerimizge tikeleı taýar óndirýshilerdiń ónimderi qoıylady. Turǵyndar úshin bul baǵa men sapa jaǵynan da tıimdi, – dedi ol.
Qala ákimdiginiń habarlaýynsha, qalada pandemııaǵa qaramastan bıznesti qoldaý sharalary belsendi túrde kórsetilýde. 1 jeltoqsandaǵy jaǵdaı boıynsha barlyǵy 77,6 myń jańa jumys orny, onyń ishinde 36,9 myń turaqty jumys orny qurylǵan. Kásipkerlik sýbektilerimen 29,8 myń jumys orny ashylsa, memlekettik baǵdarlamalar aıasynda 47,8 myń jumys orny quryldy.
Jalpy aýmaǵy 7264 sharshy metr bolatyn nysanda 234 saýda orny ornalasqan. Ortalyq Jetisý-4 yqsham aýdanynda, 32 úı meken-jaıynda tur.
ALMATY
