Bul týraly Almaty ákimi Baqytjan Saǵyntaevtyń tóraǵalyq etýimen ótken jumys keńesi barysynda habarlandy. Jıyn barysynda azyq-túlik qaýipsizdigi jáne áleýmettik mańyzy bar azyq-túlik ónimderiniń baǵalaryn ustap turý máseleleri talqylandy.
Almatyda áleýmettik mańyzy bar azyq-túlik taýarlarynyń baǵasyn turaqtandyrý úshin shamamen 9 mıllıard teńge jumsalatyn bolady. Bul qarjy retteý tetikterin iske asyrýǵa, onyń ishinde qalanyń saýda júıelerinde kelisilgen baǵamen satylatyn taýarlar jelisin ulǵaıtýǵa arnalǵan.
Búgingi kúni «Magným» saýda jelisimen áleýmettik mańyzy bar azyq-túlik ónimderin 10-nan 13 pozısııaǵa deıin ulǵaıtý jóninde kelisimder jasaldy. Oǵan qant, kúnbaǵys maıy, sıyr eti sııaqty ónimder engizildi.
Sonymen qatar jekelegen pozısııalar boıynsha saýda tańbalarynyń tizimi 10-nan 24 ataýǵa deıin ulǵaıady. Olar: kúnbaǵys maıy - 5, kúrish - 3, jumyrtqa - 2, taýyq eti - 4. Bulardan ózge, kelisilgen baǵamen satylatyn ónimderdiń jalpy kólemi 8,5 myń tonnaǵa deıin artady.
«Sabyrjan Company» JShS-men jasalǵan qoldanystaǵy nesıelik kelisimniń aıasynda 2021 jyldyń 1 qańtarynan bastap «Toımart» saýda jelisinde áleýmettik mańyzy bar azyq-túlik ónimderin 7-den 12 pozısııaǵa deıin arttyrý josparlanýda, olar - qant, kúnbaǵys maıy, pııaz, qyryqqabat jáne aıran. Saýda belgileriniń sany 7-den 15-ke deıin ósedi. Azyq-túlik ónimderiniń jalpy kólemi 1,8 myń tonnaǵa deıin ulǵaıady.
Qabyldanǵan sharalar baǵany turaqtandyrýǵa baǵyttalǵan.
Aıta keteıik, qalada dıstrıbıýtorlarmen jáne óndirýshilermen jalpy somasy 2,5 mıllıard teńge bolatyn «fıýcherlik» kelisimsharttar jasaý boıynsha jumystar bastaldy. Atalǵan qarjy 2021-2022 jyldardaǵy maýsym aralyǵy kezeńinde 21 myń tonna kókónisti daıyndaýǵa jumsalatyn bolady, bul jalpy tutynýdyń 20%-yn quraıdy.
Qazirgi kezde Almaty qalasynyń azyq-túlikti Turaqtandyrý qoryna 3,3 myń tonna ónim satyp alý jumystary qosymsha pysyqtalýda, onyń ishinde 2 myń tonna qant, 1 myń tonna kúrish jáne 0,3 tonna qaraqumyq bar.
