Qarjy sarapshylary bank endi aldaǵy ýaqytta Freedom Finance Bank Kazakhstan bolyp ózgertilýi múmkin ekenin aıtyp jatyr.
Freedom Holding Corp bas dırektory Tımýr Týrlovtyń aıtýynsha, bul qarjy ınstıtýty ınvestısııalyq kompanııanyń klıentterine onymen esep aıyrysýdy jyldam ári arzan etýge, sondaı-aq ınvestısııalaýǵa múmkindik beredi.
«Endi biz óz klıentterimizdiń Qazaqstanda bizben tezirek jáne arzanyraq esep aıyrysa alatynyna, eń jaqsy tólem sheshimderine qol jetkize alatynyna kóz jetkize alamyz. Sol arqyly bizdiń basqa seriktesterimiz, sonyń ishinde bank arqyly ınvestısııalaýǵa múmkindik alady», dedi Tımýr Týrlov YouTube-tegi tikeleı efır kezinde.
Buǵan deıin holdıngtiń basshysy Tımýr Týrlov satyp alynǵan bank birinshi kezekte ınvestısııalyq banktiń bıznesine nazar aýdaratynyn málimdegen bolatyn.
Ol sondaı-aq holdıng osy qarjy ınstıtýty negizinde qazaqstandyq brokerlik kompanııalarǵa kastodıan qyzmetin salýdy josparlap otyrǵanyn atap ótti.
Esterińizge sala keteıik, onyń quramyna «Frıdom Fınans» AQ kiretin «Frıdom Holdıng Korporasııasy» Kassa Nova bankin 2020 jyldyń tamyz aıynyń basynda satyp alý josparyn jarııalady. 21 jeltoqsanda retteýshi - Qarjy naryǵyn retteý jáne damytý agenttigi qarjy ınstıtýtyn satyp alýǵa ruqsat berý týraly habarlady.
Buryn BAQ arqyly habarlaǵandaı, AQSh-tyń baǵaly qaǵazdar jáne bırjalar jónindegi komıssııasynyń saıtynda jarııalanǵan málimetterge sáıkes, Freedom Holding Corp. shamamen 41 mıllıon dollarǵa «Bank Kassa Nova» AQ 9,3 mıllıon jaı aksııalaryn satyp alýdy josparlady.
Kelisim sharttaryna sáıkes sońǵy soma birqatar sharttarǵa baılanysty ózgerýi múmkin.
Qazaqstan Respýblıkasy Ulttyq Bankiniń aǵymdaǵy málimetteri boıynsha, 2020 jyldyń jeltoqsan aıynyń basynda Kassa Novanyń aktıvteri shamamen 91,6 mıllıard teńgeni qurady. Osy kórsetkish boıynsha jumys istep turǵan ekinshi deńgeıli 26 banktiń ishinde 19-shy orynǵa ıe boldy.
