Qazir turǵyndarǵa tehnıkalyq pasporttar úlestirilip jatyr. Bul týraly elorda ákimi Altaı Kólginov óz ınstagram paraqshasynda jazdy.
«Jańa jyl qarsańynda Nur-Sultannyń «saqaldy» qurylystarynyń birine núkte qoıyldy! Bul qurylys segiz jylǵa sozylǵan – «Jaǵalaý-3» TK, 30-blok. Úıdiń ózi paıdalanýǵa berildi. Qazir turǵyndarǵa kópten kútken páterlerine tirkeýge turýyna, emhanalarǵa, balalaryn mektepke, balabaqshaǵa tirkeýine múmkindik beretin tehnıkalyq pasporttary úlestirilip jatyr», dep jazdy Altaı Kólginov.
Aıtýynsha, bul turǵyn úı kesheninde alaıaqtarǵa aldanyp qalǵan 600-den astam otbasy bar.
«Úleskerlermen ótken alǵashqy kezdesýimizde uzaq kútken páterlerine qonystana alatynyna senimsizdik tanytqan edi. Alaıda qurylysty aıaqtaý úshin jumysymyzdy kezeń-kezeńimen júrgizdik. Túıtkildi máseleler kóp boldy: bul úıdiń qasbeti, ınjenerlik jeliler (sýmen jabdyqtaý, jylytý, káriz jelisi, elektr energııasy), kireberisterdiń ishki árleýi, lıftiler, qujattardyń tolyq tizbesiniń bolmaýy, abattandyrý», dedi qala ákimi.
Qazir istiń basym bóligi sheshildi, tek mamandar atqaratyn keıbir tehnıkalyq jumystary ǵana qaldy.
