Almaty ákimdiginiń habarlaýynsha, qala ákimniń tapsyrmasy boıynsha monıtorıngtik toptar jumysyn kúsheıtilgen rejımde jalǵastyrýda.
Maqsaty – koronavırýstyq ınfeksııanyń taralýyna jol bermeý úshin sanıtarlyq-epıdemııalyq qaýipsizdik normalarynyń saqtalýyn qamtamasyz etý.
Almaty qalasynyń Bas memlekettik sanıtarlyq dárigeriniń 26.10.2020 jylǵy № 64 qaýlysyna sáıkes:
- oıyn-saýyq, sporttyq is-sharalardy, kórmelerdi, forýmdardy, konferensııalardy, sondaı-aq otbasylyq, saltanatty, merekelik, estelik is-sharalardy onyń ishinde úıde jáne adamdar kóp jınalatyn ózge de is-sharalardy úı-jaılarda jáne ashyq aýada ótkizýge tyıym salynady;
- al 25 jeltoqsannan 5 qańtarǵa deıin – barlyq uıymdar men mekemelerde jańa jyldyq is-sharalardy ótkizýge, sondaı-aq anımatorlardy ("Aıaz Ata, Aqshaqar jáne) shaqyrý boıynsha agenttikterdiń jumysyna tyıym salynady;
- oıyn-saýyq mekemeleriniń (karaoke, bılıard, kompıýterlik, túngi klýbtar men oıyn klýbtary, boýlıng-ortalyqtar, balalardyń sporttyq jáne oıyn alańdary men attraksıondary, batýttar, korttar jáne basqa da jabyq úı-jaılardaǵy), sondaı-aq býkmekerlik keńseler men lotoklýbtarǵa barýǵa tyıym salynǵan.
Aıta ketý kerek, Almaty qalasyndaǵy epıdemııalyq ahýal kúrdeli jaǵdaıda tur. Jyl basynan beri aýmaqta koronavırýstyq ınfeksııanyń 17 995 jaǵdaıy tirkeldi.
Almaty ákimdigi qala turǵyndary men qonaqtaryn belgilengen talaptardy saqtaýǵa jáne kópshilik jınalatyn oryndarǵa, ásirese qyzmetine tyıym salynǵan mekemelerge barýdan bas tartýǵa shaqyrady.
Karantındik sharalardy buzǵany úshin zańdy tulǵalarǵa da, jeke tulǵalar da jaýapkershilik qarastyrylǵan.
