– Al, eshqandaı ruhsat qujatynsyz kesilgen aǵash kólemi úshin zań aldynda jaýap beredi. Keltirilgen shyǵyn kólemi 100 aılyq eseptik kórsetkishten assa, onda qylmystyq jaýapkershilik sanalady. Mysaly, qazan aıynda zańsyz aǵash kesken jerlerinen Maı aýdany Baskól aýylynyń tórt turǵyny ustaldy. Ormanshylardyń basty mindeti – orman baılyǵyn saqtaý, orman toly aǵashty zańsyz áreket jasaýshylardan qorǵaý, – deıdi mekeme basshysy A.Júsipov.
Qysy uzaqqa sozylatyn soltústiktegi óńirlerdiń otyn túri aǵash pen kómir ekeni belgili. Turmystyq qajettilikke kesilgen aǵashtyń ornyna kóktemde jas óskinder egilgenimen, óńirdegi aýyldar bir qysta aǵash otynnyń 400 myń tekshe metrin jaǵatyn kórinedi.
Ormanshylardyń aıtýynsha, orman sharýashylyqtarynda aǵashtar jalpylaı jáne sanıtarlyq túrde kesiledi. Aýrýǵa shaldyqqan aǵashtardyń 1 tekshe metri 1600 teńgeden satylady. Kádimgi jaıqalyp ósip turǵan saý aǵashtardyń 1 tekshe metri – 2300 teńge. Mamandar butalǵan, kesilgen bir kólik otyn aǵashyn 30-35 myń teńgeden sata alady.
– Bul jerde aǵashtar kesilip, tabıǵatqa zııan keldi dep ýaıymdaýdyń qajeti joq. О́ıtkeni jyl saıyn ormanshylar sharýashylyqta kesilgen aǵashtardyń ornyna jańa aǵashtar egedi. Kóktem, jaz aılaryndaǵy qysqy otyn daıyndaý maýsymy jeltoqsan aıyna deıin jalǵasady. Negizinen, orman alqabyn kesken saıyn ormandy tolyqtyrý mekeme tarapynan tekserilip turady. Mysaly, 1 gektar alqaptaǵy aǵashtar kesilse, kelesi jyly 2 gektar alqapqa aǵashtar egiledi, – deıdi ormanshylar.
Sanıtarlyq sharalar boıynsha jyl saıyn ormanshylar orman ishinde qýraǵan, aýrýǵa shaldyqqan eski aǵashtarǵa arnaıy belgi qoıyp ketedi. Bul aǵashtardy kesip, otynǵa jaratýǵa bolady.Otynǵa beriletin aǵashtardy alý úshin jergilikti orman sharýashylyǵynan arnaıy ruqsat qaǵazyn alady. Mysaly, bıyl mekemege qarasty ormanshylyqtarda 8500 tekshe metr aǵash jaramsyz bolyp qalǵan.
Sonymen birge Ajdar Júsipovtiń aıtýynsha, jergilikti ákimdikterdiń ótinishterine saı kóp balaly jáne az qamtamasyz etilgen otbasylaryna, basqa da muqtaj jandarǵa kómek retinde otyndyq aǵash jetkizilip beriledi. Ár aýdanda, qalada jer úıde turatyn 10 otbasyǵa bir tekshe metrden, al qys sýytqan kezde qosymsha otyndyq aǵash beriledi.
Pavlodar oblysy
