Nur-Sultanda beıindi mınıstrlik pen elimizdegi Ulttyq Olımpıadalyq komıtettiń jumys barysyndaǵy kezdesýi ótti. Taraptar qazaqstandyq sportshylardyń Tokıo men Beıjińdegi Olımpıada oıyndaryna jáne 2021-2022 jyldarǵa josparlanǵan ózge de keshendi jarystarǵa daıyndyǵyn sóz etti.
Kezdesý barysynda Qazaqstandaǵy buqaralyq sportqa qatysty ózekti máseleler talqylandy. Sondaı-aq, ulttyq qurama komandalardyń oqý-jattyǵý jıynyn uıymdastyrý jáne pandemııa kezinde qazaqstandyq atletterdiń olımpıadaǵa irikteý týrnırlerine qatysý múmkindikteri de nazardan tys qalǵan joq.
«Memleket basshysy óziniń kezekti joldaýynda buqaralyq sportty qarqyndy damytýdy tapsyrdy. Qazirgi tańda óskeleń urpaqtyń sporttyq jáne shyǵarmashylyq áleýetine jiti nazar aýdarý qajet. Álemdegi sporttyń mańyzdylyǵy sát saıyn artyp keledi, al indet kezinde sportpen aınalysýdyń áleýmettik salmaǵy tipti zor. Dene shynyqtyrý men sportty damytýǵa kúsh salý bizdiń memlekettegi áleýmettik saıasattyń negizgi bólshegi sanalady. Sportpen aınalysý jastardy jaýapkershilikke, toleranttylyqqa, áriptestik tanyta bilýge baýlyp, tulǵany áleýmettendirýge jáne pandemııa kezinde qoǵamnyń qaıta qalpyna kelýine tikeleı áser etedi. Olımpıada shyńyna shyqqan sportshylarymyzdyń iri jetistiginiń túp negizinde buqaralyq balalar sporty turǵany eshkimge de qupııa emes.
Sondyqtan, buqaralyq balalar sportyn damytýdy sóz qylǵanda mamandar pikirine erekshe kóńil bólip, Ulttyq Olımpıada komıteti men sheteldegi úzdik tájirıbelerdi basty baǵdarda ustaý kerek. Ǵalamdyq pandemııa kezinde bizdiń sportshylardyń Olımpıada oıyndaryna tolyqqandy jáne qaýipsiz daıyndalýyna jaǵdaı jasaý óte mańyzdy. О́ıtkeni, olardyń Olımpıadadaǵy bolashaq jeńisteri talaı jyldar boıy bizdiń jastarymyz ben balalarymyz úshin myqty motıvasııa jáne áleýmettik tabystyń úlgisi bolmaq», dep atap ótti Mádenıet jáne sport mınıstri Aqtoty Raıymqulova.
Qazaqstan Ulttyq Olımpıadalyq komıtetiniń Bas hatshysy Andreı Krıýkov beıindi vedomstvo basshysyna Ulttyq qurama komandalardyń qazirgi jaǵdaıy men daıyndyǵy týraly aqpar berdi. Búginge deıin qazaqstandyq sportshylar sporttyń 17 túrinen 42 joldama ıelendi. Olımpıada oıyndarynyń irikteý kezeńderine daıyndyq prosesi jalǵasýda.
«UOK aldyndaǵy basty mindetterdiń biri – ulttyq qurama komandalardy COVID-19 indeti kezinde aldaǵy Olımpıada oıyndaryna daıyndaý. Osy oraıda, taǵy bir qyzyqty jaıtty aıta ketken jón. Bizdiń tarıhymyzda alǵash ret kelesi 12 aıdyń ishinde 2 Olımpıada – qysqy jáne jazǵy oıyndar ótedi. Ádette, bul sporttyq oqıǵalardyń arasyn bir jarym jyl bólip turatyn, alaıda, ǵalamdyq pandemııa biraz ózgeris engizdi. Búginde eki jarystyń arasy nebary bes aıdy quraıdy.
Sondyqtan, qysqy jáne jazǵy sport túrlerindegi atletterdiń jarysqa bir mezette daıyndalýy erekshe kúsh-jigerdi talap etedi. Bizdiń sportshylarymyz az ýaqyttyń ishinde birneshe irikteý týrnırleri men turaqty jarystarǵa qatysýy tıis. Ulttyq qurama komandalar kúntizbesinde ártúrli deńgeıdegi 430 halyqaralyq týrnır, elimiz ben shetelderde ótetin 640 oqý-jattyǵý jıyny josparlanǵan.
Mundaı jaǵdaıda buryn qalypty kóringen jaıttardyń barlyǵyna erekshe talap qoıylatyny anyq. Qazaqstan UOK úshin sportshylardyń densaýlyǵyn saqtaı otyryp, jarysqa qaýipsiz daıyndyq jumystaryn júrgizý basty mindetterdiń biri bolmaq. Bizdiń barlyq jumysymyz osy maqsat tóńireginde órbıdi.
Ulttyq qurama komandalardyń jattyǵý jıyny men jarysyn baqylaýǵa arnalǵan jedel shtab quryldy. Sonymen qatar, Tokıo jáne Beıjińdegi Olımpıada oıyndaryna qatysatyn qazaqstandyq atletterge áleýmettik logıstıkany uıymdastyrý máselesi de qarastyrylyp jatyr. Bizdiń mamandar barlyq prosesti jiti qadaǵalaýda. Oıyn aldyndaǵy daıyndyq, Olımpıadaǵa qatysý, Olımpıada aýylyna baryp, elge qaýipsiz qalpynda oralýǵa deıingi jaǵdaılar túgel baqylaýda.
Qazirgi basty mindetimiz – daıyndyqty jalǵastyryp, jarysty sátti jáne qaýipsiz kúıinde aıaqtaý. Bárimizge ortaq maqsatqa jetý úshin biz qoldan kelgenniń bárin jasaýdamyz. Búginde UOK olımpıadalyq sport túrlerinen 39 sporttyq federasııanyń basyn biriktirgen, halyqaralyq federasııalar moıyndaǵan jáne sport túrlerinen naqty bilimge ıe zamanaýı qoǵamdyq uıymǵa aınaldy. О́z qarajatymyzdyń esebinen biz UOK qyzmetin sıfrlandyrý prosesin júzege asyryp jatyrmyz.
UOK-tegi barlyq qujat aınalymdary elektrondy formatqa aýystyrylǵan, barlyq tólemder tek onlaın kúıinde jasalady, bıznes-prosester, onyń ishinde, baqylaý mehanızmderi de sıfrlandyrylýda. Is-sharalardy uıymdastyrý kezinde jobalyq ádister jáne basqa da tehnologııalar engizilýde. Sıfrlandyrý keshigýdiń aldyn alyp, barlyq prosesti jeńildete túsedi. Bul jańashyldyqtyń barlyǵy tıimdilikti arttyryp, oryndaýshylardyń jaýapkershiligin nyǵaıtady», deıdi UOK bas hatshysy Andreı Krıýkov.
Sonymen qatar, jıyn barysynda sporttyq bilim berý, kadrlardy daıyndaý jáne biliktilikti arttyrý máseleleri de nazardan tys qalǵan joq. Dopıngpen kúres jáne qazaqstandyq dopıngke qarsy zerthanaǵa WADA lısenzııasyn qaıtarý týraly da sóz qozǵaldy. Qazirgi tańda zerthana óz statýsyn qaıtarý úshin jumystanýda. Jumys barysyndaǵy kezdesýdiń basty mindeti retinde sportty damytýdyń strategııalyq maqsattary, kúrdeli suraqtardy jáne sport salasyndaǵy mańyzdy máselelerdi sheshý bolǵanyn aıta ketý kerek.
Aıta ketelik, Qazaqstan Ulttyq Olımpıadalyq komıteti 2018 jyldan beri olımpıadalyq sport túrlerinen ulttyq qurama komandalardy daıyndaý jónindegi memlekettik tapsyrmany oryndaýda.
