Brıfıngti «Saılaýdaǵy ádil jáne adal baqylaý týraly» hartııasynyń bastamashysy Aıgúl Soloveva bastap, saılaýǵa qatysqandardyń jáne olardyń laıyqty órkenıetti deńgeıde ótýi úshin eńbek etkenderdiń barlyǵyna alǵysyn bildirdi.
«Hartııanyń bastamashysy retinde óz atymnan negizinen búkil prosestiń monıtorıngi qazirgi zamanǵy halyqaralyq standarttar negizinde júrgizildi dep aıta alamyn. Baıqaý úsh kezeńmen ótedi. Birinshisi – bul ýchaskelerdi daıyndaýdyń saılaýǵa deıingi monıtorıngi. Halyqaralyq mamandar atap ótkendeı, bári jaqsy deńgeıde bolǵanyny bizdi qýantty. Ýchaskeler der kezinde daıyn bolyp, barlyq ýchaskelerde mobıldi medısınalyq kabınetter uıymdastyryldy jáne basty shart oryndaldy – saılaýshylardyń barlyq sanattary úshin teń qoljetimdilik qamtamasyz etildi. Ekinshi – saılaý kúni, munda prosess óreskel oqıǵalarsyz ótti. Biraq biz barlyq faktiler men alynǵan derekterdi taldaǵannan keıin qorytyndy shyǵaramyz. Partııalar men BAQ tarapynan barlyǵy óte órkenıetti boldy dep aıtýǵa bolady. Qazir biz kelip túsken barlyq derekterdi taldaý jáne halyqaralyq uıymdar úshin esep daıyndaý degen úshinshi kezeńdemiz», – dedi A.Soloveva.
A.Solovevanyń pikirine qaraǵanda, halyqaralyq quqyq prızmasy arqyly – bári barlyq erejeler men normalarǵa sáıkes ótti.
«Aldaǵy ýaqytta biz áli de zertteıtin bolamyz... jáne shamamen eki aı ishinde biz saılaýdy baqylaý týraly qorytyndy esep daıyndaımyz jáne bizdiń azamattyq qoǵam óz elinde bolyp jatqan jaǵdaıǵa baǵa bere alatyndyǵyn dáleldeı alamyz dep úmittenemin. Saılaý prosesiniń ózi bizdiń qoǵamnyń azamattyq jetilgenin kórsetti», – deıdi A.Soloveva.
Brıfıngti Rafael Gasanov jalǵastyryp, barlyǵyn saılaýdyń aıaqtalýymen quttyqtap, osy ýaqyt ishinde shuǵyl rejımde jumys istegen, qaýyrt rejımde qoǵam ókilderine men buqaralyq aqparat quraldarynyń qyzmetkerlerine alǵysyn bildirdi.
Rafael Gasanov «Jastarǵa jol» qoǵamdyq qorynyń shtaby atqarǵan jumystarǵa baǵa bere kele: «Tańǵy saǵat 10-da bizdiń sarapshylar shtabtyń jedel jelisine túsken barlyq derekterdi jáne táýelsiz baqylaýshylardyń hattamalaryn zerttedi. Qazir jalpy saılaý sátti ótti dep aıtýǵa bolady, bizdiń baqylaýshylar saılaý prosesiniń óreskel buzylýyn nemese saılaýshylardyń azamattyq quqyqtarynyń buzylýyn kezdestirmedi», – deıdi.
Sonymen qatar, R.Gasanovtyń aıtýynsha, erekshe nazar aýdarýǵa laıyqty sátter boldy. Keleńsiz jaǵdaılardyń barlyq faktileri men jaǵdaılary tirkelgen, olar jiktelip, qorytyndy esepke engiziletin bolady.
«Biz áleýmettik jeliler monıtorınginen kelip túsken, «arandatýshylyq» sıpattaǵy aqparatty eskermedik. Keshe biz osy faktilerdi rastaý nemese joqqa shyǵarý úshin resmı organdarǵa kúni boıy suraý saldyq. Bul sátter de tirkelip, faktilerdiń túpnusqalyǵyn anyqtaý jáne prosessýaldyq sheshim qabyldaý úshin tıisti qadaǵalaý organdaryna beriletin bolady», – dedi R.Gasanov.
Onyń aıtýynsha, baqylaýshylar jumysynda da kemshilikter boldy.
«Qazir biz nusqaýlyqqa, baqylaýshylardy daıarlaý jónindegi jumysqa jáne t.b. keıbir tustardy engizý qajet ekenin túsindik. Biz óz qatelikterimizdi moıyndaımyz. Bul bizdiń alǵashqy tájirıbemiz jáne úlken tájirıbe boldy. Biz jas bolǵandyqtan syndy qabyldaımyz, úırenemiz», – deıdi R.Gasanov.
ALMATY
