«Aq jol» partııasynyń tóraǵasy saıası uıymdy qoldaǵan otandastaryna alǵys bildire kele, bul naýqanda úlken tájirıbe jınaǵanyn basa aıtty. Onyń aıtýynsha, bıylǵy naýqan qaýipti indetpen tuspa-tus keldi. Soǵan qaramastan, saılaý barlyq sanıtarlyq talapty saqtaı otyryp uıymdastyryldy.
«Men «Aq jol» partııasyna jáne ózge de saıası partııalarǵa daýys bergen otandastaryma shyn júrekten alǵys aıtamyn. Sebebi árbir azamattyń daýysy óte mańyzdy. Saıası partııalarymyz ben saılaýshylarymyz óte jaqsy tájirıbe jınady. Ol tájirıbe ári qaraı da elimizdiń damýyna, demokratııalandyrýyna óte paıdaly bolady dep oılaımyn. Bizdiń partııaǵa kórsetken senimdi aqtaýǵa tyrysamyz. Oǵan esh kúmán bolmasyn jáne de bizdiń áriptesterimiz – basqa da partııa tóraǵalaryn, Tuńǵysh Prezıdentimizdi quttyqtaǵym keledi», dedi A.Perýashev.
«Aq jol» partııasynan Májiliske 38, máslıhatqa 705 kandıdat usynylǵan edi. Exit poll nátıjelerin jarııalaǵannan keıin aqjoldyqtar bir-birin quttyqtap, saılaýshylarǵa alǵys aıtyp, áriptesterine tabys tiledi.
