Indýstrııa jáne ınfraqurylymdyq damý mınıstrliginiń jospary boıynsha 2021 jyly jerasty transporttyq ınfraqurylymyn jasaýǵa 10,4 mlrd teńge bólinedi.
Sondaı-aq 2022-2023 jyldarǵa arnap taǵy 10 mlrd teńge bólý qarastyrylǵan.
2020 jyly qarjylandyrý kólemi 6,8 mlrd teńgeni quraǵan edi. 2013-2019 jyldar aralyǵynda atalǵan kórsetkish 35,9 mlrd teńgege teń bolǵan. Josparǵa sáıkes 2021 jyldyń jeltoqsan aıynda «Saryarqa» jáne «Dostyq» stansalary salynbaq.
Eske salaıyq, Almaty qalasynda metro 2011 jyly paıdalanýǵa berildi. Qazirgi tańda 9 beket jumys istep tur. Endi taǵy eki bekettiń qosylýymen jolaýshylar aǵyny óse túspek. «Metropolıten» memlekettik qazynashylyq kásiporny basshylyǵynyń aıtýynsha, aldaǵy ýaqytta jolaýshylar aǵyny táýligine 80 myń adamǵa deıin artady dep kútilip otyr. Al 2025 jyldan bastap metro qurylysynyń ekinshi jelisi salyna bastaıdy. Ol qala ortalyǵyn «Almaty-1» temirjol vokzalymen jalǵastyrmaq.
