Vedomstvo basshysynyń aıtýynsha, ótken jyly da AО́K-de turaqty ósim saqtalǵan.
2020 jyly aýyl sharýashylyǵynyń jalpy óniminiń kólemi bir jylda 5,6%-ǵa artyp, 6,3 trln teńgeni qurady.
Negizgi ósim – ósimdik sharýashylyǵyndaǵy óndiris kóleminiń 7,8%-ǵa, ıaǵnı 3,6 trln teńgege deıin ulǵaıýymen qamtamasyz etildi.
Elimizdiń 5 oblysy: Qostanaı (shamamen 121%), Aqmola (shamamen 113%), Pavlodar (107,5%), Aqtóbe (106,7%) jáne Qaraǵandy (105,7%) joǵary ósý qarqynyn kórsetti.
Mal sharýashylyǵynyń jalpy óniminiń kólemi 3%-ǵa artyp, 2,6 trln teńgeni qurady. Bul rette tiri salmaqta et óndirý kólemi 4,1%-ǵa, sút óndirý kólemi 3,2%-ǵa óskeni baıqalady.
Shıkizatty qaıta óńdeý salasy da oń dınamıkany kórsetti. Azyq-túlik ónimderiniń óndirisi 2020 jyldyń 12 aıynda 4%-ǵa ósip, 1,9 trln teńgeni qurady.
Sary maıdy 26,5%-ǵa, óńdelgen kúrish – 20,1%-ǵa, shujyq ónimderi – 8,2%-ǵa, makaron ónimderi – 6,3%-ǵa, óńdelgen sút – 4,9%-ǵa, sút ónimderi – 4,8%-ǵa, irimshik jáne súzbe – 4,5%-ǵa, un – 1,6%-ǵa artyq óndirile bastady.
2020 jyldyń 12 aıynda aýyl sharýashylyǵynyń negizgi kapıtalyna ınvestısııalar 15%-ǵa ulǵaıyp, 573,2 mlrd teńgeni qurady. Azyq-túlik ónimderi óndirisiniń negizgi kapıtalyna ınvestısııalar 13,5%-ǵa artyp, 104 mlrd teńgege jetti.
«AО́K kórsetkishteriniń turaqty ósýi negizinen fermerlerdiń úılesimdi jumysynyń jáne Úkimettiń Covid-19 pandemııasy jaǵdaıynda egis jumystaryn júrgizý úshin aýyl sharýashylyǵy taýarlaryn óndirýshilerdiń kedergisiz qozǵalysyn, janar-jaǵarmaı, qosalqy bólshekter, tuqymdar, tyńaıtqyshtar men ósimdikterdi qorǵaý quraldaryn jedel jetkizýdi qamtyǵan jumys algorıtmin ýaqtyly qabyldaýynyń arqasynda qamtamasyz etildi. Nátıjesinde egis sapaly jáne ońtaıly agrarlyq merzimde júrgizildi», dep atap ótti S. Omarov.
