yujanka.kz
Qazaqstan kásipkerleriniń quqyqtaryn qorǵaý jónindegi ýákil – bıznes-ombýdsmen Rýstam Júrsinovtiń aıtýynsha, kedendik tekserý júrgizý rásimderin jetildirýge qatysty túzetýler Májilistegi Nur Otan partııasynyń fraksııasy men «Atameken» ulttyq kásipkerler palatasy arasyndaǵy 2020 jylǵa arnalǵan yntymaqtastyq týraly jol kartasyn iske asyrý aıasynda ázirlengen. Túzetýler kásipkerlerdiń zańdy múddelerin qorǵaýǵa, júrgiziletin tekserýler sapasyn arttyrýǵa, sondaı-aq bıznestiń kedendik tekserýler nátıjelerine shaǵymdanýǵa ketetin ýaqytyn únemdeýge, qarjylyq shyǵyndardy tómendetýge múmkindik beredi.
– Kameraldyq kedendik tekserý júrgizý tártibi tolyqtaı ózgerdi. Endi bul rásimge kameraldyq salyqtyq baqylaý elementteri engizildi. Iаǵnı tekserý barysynda zań buzýshylyq anyqtalsa, kásipkerdi birden ákimshilik jaýapkershilikke tartpaı-aq, oǵan bul olqylyqty óz kúshimen joıýǵa múmkindik beriledi. Sonymen qatar atalǵan tekserýlerdiń merzimi 6 aıdan 2 aıǵa deıin qysqardy. Sondaı-aq syrtqy ekonomıkalyq qyzmetke qatysýshylardyń qosymsha qujattardy usyný merzimi 5 jumys kúninen 2 aıǵa deıin uzartyldy, – dedi Rýstam Júrsinov.
Bıznes-ombýdsmennyń aıtýynsha, salyqtyq tekserýlerge uqsas kedendik tekserýdiń jańa túri engizilgen. Bul – táýekelderdi basqarý júıesin qoldaný negizinde júrgiziletin keshendi kóshpeli kedendik tekserý. Atalǵan tekserý bekitilgen jartyjyldyq kestege sáıkes júrgiziledi, bul keste ýákiletti organnyń saıtynda ornalastyrylady. Sondaı-aq kásipkerge 30 kún buryn tekserý júrgiziletindigi týraly habar beriledi.
– Kedendik tekserý qorytyndylary boıynsha aldyn ala akt rásimdeledi. Oǵan kásipker óziniń kelispeýshiligin bildire alady jáne onyń joldaǵan talap-aryzyn memlekettik kiris organdary qaraýǵa mindetti. Sondaı-aq endi kóshpeli kedendik tekserýlerdi syrtqy ekonomıkalyq qyzmetke qatysýshy tirkelgen jeri boıynsha bir ǵana keden organy júrgizetin bolady. Kózdelgen tártipti óreskel buzý faktileri anyqtalǵan jaǵdaıda kedendik tekserýdi jaramsyz dep tanıtyn zańnamalyq norma bekitildi. Atalǵan túzetý engizilgenge deıin ınspektorlardyń tekserý júrgizý merzimderin, rásimdik máselelerdi, suraý salý jáne suraý salynatyn qujattardy qaraý tártibin buzǵanyna qaramastan, tekserý aktisiniń kúshin joıý jáne ony jaramsyz dep tanýǵa múmkindik bolǵan joq, – dep naqtylady R.Júrsinov.
Salyqtyq tekserýler kezinde osyǵan uqsas jaǵdaılar oryn alǵanda apellıasııalyq komıssııa Salyq kodeksiniń jáne Kásipkerlik kodeksiniń normalaryn basshylyqqa ala otyryp, atalǵan tekserýdi jaramsyz dep tanyp, kásipkerdiń paıdasyna sheshim shyǵarady. Bul túzetý oryn alǵan qaıshylyqtardy joıýǵa jáne syrtqy ekonomıkalyq qyzmetke qatysýshynyń quqyqtaryn tolyq kólemde qorǵaýǵa múmkindik berdi. Al kórsetiletin memlekettik qyzmetterdiń sıfrly formatqa kóshýi tıisti ótinishti elektrondy túrde usynýǵa jol ashady. Bul rette qujattardy qaraý merzimi 50 paıyzǵa qysqartylady jáne yqtımal sybaılas jemqorlyqqa da jol berilmeıdi.
Tutastaı alǵanda, keden organy taýardyń kedendik qunyn qaıta qaraǵan jaǵdaıda deklarantty, al keden organy taýarlardy durys jiktemegen kezde jáne buzýshylyqtardy óz betinshe joıǵan kezde keden ókilderin jaýapkershilikke tartpaýdy kózdeıtin normalar zańnamalyq túrde bekitildi. Sondaı-aq osy zańnamalyq normalarǵa sáıkes, «ASTANA-1» aqparattyq júıesi jumysynda qatelikter anyqtalǵan jaǵdaıda ákimshilik jaýapkershilikke tartylmaıtyn boldy.
– Keden organdary taýarlardy shyǵarǵan sátten bastap talap qoıý merzimine baılanysty 3-5 jyl ótkenine qaramastan, kedendik qun boıynsha jáne taýarlardy jikteý boıynsha buryn qabyldanǵan sheshimderdi qaıta qaraý tájirıbesin jıi qoldanady. Osyndaı tekserýdiń nátıjesi boıynsha kedendik bajdardy, salyqtardy jáne ósimpuldardy qosymsha esepteý júrgiziledi, sondaı-aq kásipker jaýapkershilikke tartylady. Al osy túzetýler engizilgennen keıin kásipker memlekettik kiris organdarynyń laýazymdy tulǵalarynyń qatelikteri úshin jaýap bermeıtin bolady, – dedi bıznes-ombýdsmen.
Rýstam Júrsinov bıýdjetke túsetin túsimniń tómendeýine ákep soǵatyndyqtan, zań jobasyn qaraý barysynda kedendik tólemder men tekserýlerge qatysty keıbir usynystardyń qoldaý tappaǵanyn atap ótti. Bul usynystar bıyl memlekettik organdarmen birge qaıta pysyqtalmaq.
