12 qańtarda shamamen keshki saǵat 22.30-da Báıdibek aýdanynyń aýmaǵyndaǵy Shymkent-Samara tas jolynyń 56 shaqyrymynda “Volvo” markaly aýyr júk kóliginiń júrgizýshisi róldi basqara almaı, kólik aýdarylyp qalǵan.
Oqıǵa ornyna jetken Báıdibek aýdanynyń PB polıseıleri kólik tizgininde otyrǵan sheteldik azamatqa avtokólikti qaıta turǵyzýǵa kómektesip, ony aıyppul turaǵyna jetkizdi. Kókónister tıelgen bul avtokóliktiń Qyrǵyzstan Respýblıkasynan Reseı Federasııasyna qaraı baǵyt alǵany anyqtaldy.
Jol apaty saldarynan qaza bolǵandar men zardap shekkender joq. Júrgizýshige tıisti medısınalyq kómek kórsetildi.
Polısııa qyzmetkerleri Qyrǵyzstan Respýblıkasynyń azamaty bolyp tabylatyn kólik júrgizýshisine qatysty QR ÁQBtK-niń 610-baby (Kólik quraldary júrgizýshileriniń jol júrisi qaǵıdalaryn adamdardyń densaýlyǵyna zııan keltirýge, kólik quraldarynyń nemese ózge de múliktiń búlinýine alyp kelgen buzýshylyǵy) boıynsha ákimshilik hattama toltyrdy.
Jınalǵan materıaldar tıisti sheshim qabyldaý úshin sotqa jiberiletin bolady. Qyrǵyzstan Respýblıkasynyń azamaty polıseılerdiń kórsetken kómegine óz rızashylyǵyn jetkizdi.
– Túnde trassada meniń kóligim aýdarylyp qaldy. Sol sátte der kezinde kómekke kelip, meni qutqaryp qalǵan polıseılerge alǵys aıtamyn! Meni tamaqtandyryp, medısınalyq kómek te kórsetti. Aýdarylǵan kóligimdi qaıtadan turǵyzyp berdi. Polıseılerge úlken raqmet! – dedi ol.
О́z kezeginde, tártip saqshylary avtokólik ıelerin jolda, ásirese aýa-raıynyń qolaısyz kezinde jáne kóktaıǵaqta abaı bolýǵa shaqyrady. Sondaı-aq jol qozǵalysy erejeleri men araqashyqtyqty saqtaý týraly eskertedi.
