«Saılaýdyń qorytyndylary jarııalandy. Halqymyz belsendilik tanytyp, óz tańdaýyn jasady. Saılaý zań aıasynda jáne halyqaralyq standartarǵa saı ótti. Sheteldik sarapshylar men halyqaralyq baıqaýshylar da joǵary baǵa berýde. Memleket basshysynyń birqatar saıası reformalary alǵash ret osy saılaýda iske asyrylǵanyna kýá boldyq», - dedi Máýlen Áshimbaev.
Senat Tóraǵasy táýelsizdiktiń 30 jyldyǵynda Parlament aldynda Elbasy men el Prezıdenti belgilegen mańyzdy mindetter turǵanyn atap ótti. Olardy tıimdi iske asyrý úshin Senat Májilispen birlese otyryp sapaly zańdar qabyldaýǵa tıis.
Otyrys barysynda Parlament depýtattarynyń bastamasymen ázirlengen eki zań jobasy qaralyp, qabyldandy.
Olardyń birinde aýyl turǵyndaryna arnalǵan sý tarıfin tómendetý kózdelip otyr. Oǵan sýbsıdııa alý jónindegi rásimderdi ońtaılandyrý esebinen de qol jetkizilýge tıis. Al osy tarıfterdiń ózi endi naqty óńirdiń áleýmettik-ekonomıkalyq damýyn eskere otyryp aıqyndalýy tıis.
Mundaı jańalyqtar «Qazaqstan Respýblıkasynyń Sý kodeksine jergilikti ókildi, ortalyq jáne jergilikti atqarýshy organdar arasynda aýyzsýmen jabdyqtaýdy sýbsıdııalaý jónindegi ókilettikterdiń arajigin ajyratý máseleleri boıynsha ózgerister men tolyqtyrýlar engizý týraly» zańda qarastyrylǵan. Qujat búgin eki oqylymda qabyldandy.
«Aýyldyq eldi mekenderdi sapaly aýyzsýmen qamtamasyz etý – elimizdiń aldynda turǵan basty mindetterdiń biri. Depýtattar bastamashylyq jasaǵan osy zań aýyldyq jerlerdi sýmen jabdyqtaý máselelerin sheshý jolyndaǵy mańyzdy qadam ekeni sózsiz. Usynylyp otyrǵan normalar óńirlerdi damytýǵa jáne jergilikti atqarýshy organdardyń jumysynyń tıimdiligin arttyrýǵa yqpal etetini aıqyn», - dep atap ótti Máýlen Áshimbaev.
Sonymen qatar, depýtattar jyljymaıtyn múlikke quqyqtardy ýaqtyly tirkemegeni úshin ákimshilik jaýapkershilikti alyp tastaýdy usyndy. Endi budan bylaı mundaı keshigý orynalǵanda adamdar jazaǵa tartylmaıdy jáne aıyppul salynbaıtyn boldy. Sonymen qatar, jer ýchaskesine qujattardy resimdeý jáne jyljymaıtyn múlikke quqyqtardy memlekettik tirkeý rásimi aıtarlyqtaı jeńildetiledi. Osylaısha, adamdarǵa osy memlekettik qyzmetterdi alý ońaıyraq bolady. Bul jańashyldyqtar depýtattar qabyldaǵan «Qazaqstan Respýblıkasynyń keıbir zańnamalyq aktilerine jyljymaıtyn múlikke quqyqtardy jáne zańdy tulǵalardy memlekettik tirkeý máseleleri boıynsha ózgerister men tolyqtyrýlar engizý týraly» zańda jazylǵan.
