Almaty ákimdigi qala turǵyndary men qonaqtaryn karantın sharalary - áleýmettik qashyqtyqty saqtap, betperde rejıminiń saqtalýyn kúsheıtýge, sondaı-aq múmkindiginshe jabyq úı-jaılarda uzaq ýaqyt bolýdan bas tartýǵa shaqyrady.
Almaty qalasy Sanıtarlyq-epıdemıologııalyq baqylaý departamentiniń málimeti boıynsha, aýrýdyń eń kóp taralýy 20-39 jas aralyǵynda – 35% jáne 40-59 jas aralyǵynda - 31% baıqalady. Bul jańa jyl aldyndaǵy jáne kelesi demalys kúnderi korporatıvtik keshterdi ótkizýmen jáne saýda nysandaryna barýmen baılanysty.
Qoǵamdyq oryndardyń ishinde (saýda, qoǵamdyq tamaqtaný nysandary) – 41%, otbasylardaǵy baılanys – 27% jáne qoǵamdyq kólik – 21% quraıdy.
Osyǵan baılanysty almatylyqtarǵa saqtyq sharalaryn qatań saqtaý, múmkindiginshe adamdar kóp jınalatyn oryndardan aýlaq bolý, betperdelerdi durys paıdalaný, jeke gıgıenany saqtaý sekildi eskertýler jasalady. Sondaı-aq zeınetkerlerdiń turǵyn úıden shyǵýyn shekteý qajet. Respıratorlyq ınfeksııalardyń belgileri paıda bolǵan jaǵdaıda jeke bólmede oqshaýlanyp, ýchaskelik dárigerdi úıge shaqyrý jáne koronavırýstyq ınfeksııa dıagnozy qoıylǵan kezde jaqyn adamdarynyń, týystary men kórshileriniń juqtyrýyn boldyrmaý úshin karantındik stasıonarǵa jatqyzýdan bas tartpaý kerek.
Aıta ketý kerek, ınfeksııanyń syrttan kelý jaǵdaılarynyń tirkelýi jalǵasýda. 06.10.2020 jylǵy kezeńnen beri koronavırýstyq ınfeksııanyń 77 jaǵdaıy tirkeldi. О́tken táýlikte Dýbaı – Almaty reısimen kelgen jolaýshylarda koronavırýs ınfeksııasynyń 2 jaǵdaıy anyqtaldy.
Sonymen birge, álemde COVID-19 jaǵdaıy ýshyǵa tústi. Elder aldyn alý sharalaryn kúsheıtýde. Mysaly, Nıderlandyda shekteýlerdi 9 aqpanǵa deıin uzartty. Italııanyń densaýlyq saqtaý mınıstri Roberto Speransa Parlamentke tótenshe jaǵdaıdy 30 sáýirge deıin uzartý týraly habarlady. Shveısarııa koronavırýspen kúresý úshin karantındi odan ári kúsheıtip, 22 qańtardyń ornyna ony qystyń sońyna deıin jalǵastyrdy.
