Pandemııaǵa baılanysty uzaq úzilisten keıin sharshy alańǵa oralǵan Qazaqstan quramasynyń bylǵary qolǵap sheberleri Serbııadaǵy týrnırde táýir nátıje kórsetip, jankúıerlerdiń kóńilinen shyǵa bildi. Sebebi jarysqa barǵan 9 boksshynyń 8-i júldegerler qatarynan kórindi. Atap aıtar bolsaq, Araılym Marat (48 kg), Dına Jolaman (54 kg), Vladıslava Kýhta (57 kg), Rımma Volosenko (60 kg) men Lázzat Kúngeıbaeva (+81 kg) esh qıyndyqsyz fınalǵa deıin jetip, altyn medal úshin ótken jekpe-jekte de aıanyp qalǵan joq. Nátıjesinde, bes boksshymyz da altynnan alqa taqty. Al fınalǵa shyqqan taǵy bir jerlesimiz Gúlsaıa Erjan (+81 kg) bas júlde úshin ótken básekede qarsylasyna jol berip, kúmispen kúpteldi. Sonymen qatar Valentına Halzova (69 kg) men Marına Volnova (75 kg) qola júldeni qanaǵat tutty.
