Búgingi tańda «Almaty Finance» kompanııasy tamaq ónerkásibinde, IT-salasynda, kreatıvti ındýstrııada jobalardy iske asyrýǵa qarjylandyrýdy usynady, sondaı-aq ónerkásiptik parkterdiń servıstik ortalyqtaryn, balabaqshalar, jalpy bilim beretin mektepter, medısınalyq ortalyqtar, mádenıet nysandary, sport alańdary jatatyn áleýmettik sala nysandaryn salý men damytýdy qarjylandyrady.
«Sonymen qatar qazirgi pandemııany eskere otyryp, biz óz baǵdarlamalarymyzdy qaıta qarap, jańa formattaǵy úıdiń janyndaǵy dúkender sııaqty baǵyttardy qarjylandyra bastadyq», dedi «Almaty Finance» JShS Basqarma tóraǵasynyń orynbasary Zańǵar Sálimbaev.
Spıkerdiń aıtýynsha, pandemııaǵa baılanysty júıelik negizde bıznespen kezdesýler ótkizildi.
«Biz óz baǵyttarymyzdy qaıta qaradyq jáne qazirgi ýaqytta ózimiz úshin 7 basym baǵytty aıqyndadyq. Olardyń arasynda kreatıvti ındýstrııa, oıyn-saýyq, áleýmettik nysandar qurylysy, úı janyndaǵy dúkender jelisi, óndiristik sektordy damytý jáne qyzmet kórsetý salasynyń ortalyqtaryn keńeıtý, stasıonarlyq emes saýda núktelerin qurý, sondaı-aq óńdeý ónerkásibin odan ári damytý bar. Búgingi tańda biz osy 7 baǵytqa nazar aýdaryp otyrmyz. Qazirgi ýaqytta bul baǵyttar Almaty kásipkerlerinde suranysqa ıe. Qazirgi pandemııaǵa baılanysty kóptegen kásiporyndar basqa baǵyttar men ártaraptandyrýǵa júginedi. Kóbisi qazir medısına men basqa salalarǵa aýysýda», dep túsindirdi ol.
Esterińizge sala keteıik, 2019 jyldan beri 8 mlrd teńgeden astam somaǵa 42 joba maquldandy, júzden astam jumys orny quryldy.
