Statıstıkalyq málimetterge súıenetin bolsaq, turaqty birinshiliktegi eń nátıjeli báseke Qazaqstannyń «Barysy» men Habarovskiniń «Amýr» komandalary arasynda ótedi eken. Búginge deıin eki komanda muzaıdynda 40-tan asa kezdesý ótkizse, ár oıynda keminde úsh shaıba soǵylǵan. Uzaqqa barmaı-aq, eki ujym arasyndaǵy keıingi eki matchtyń esebin alar bolsaq, hokkeıshiler 4 qańtarda ótken alǵashqy oıynda – 9, 6 qańtardaǵy básekede 6 shaıba soqqan bolatyn. Mine, kúni keshe elordadaǵy matchta kórermender 5 goldyń kýási boldy.
Kezdesýdiń birinshi bóliginde aıdyn ıeleri eki shaıba soǵyp, úziliske kóterińki kóńil kúıde shyqty. «Barystyń» eki golyn da Nıkıta Mıhaılıs saldy. Qazaqstandyq shabýylshy 22-mınýtta esep ashsa, 27-mınýtta dýbldiń avtory atandy. Alaıda jerlesterimiz ekinshi kezeńdi sátsiz bastady. Oıyndaǵy basymdyqty óz qolyna alǵan «Amýr» hokkeıshisi Dmıtrıı Lýgın (37-mınýt) esep aıyrmasyn qysqartsa, úshinshi 20 mınýtta Sergeı Tereshenko (46-mınýt) tarazy basyn teńestirip ketti. Arada eki mınýt ótkende Nıkıta Mıhaılıs kezdesýdegi úshinshi shaıbasyn soǵyp, básekeniń núktesin qoıdy. Qorytyndy esep – 3:2.
